【嗚巴軼事】香港人揸車唔止係具攻擊性，直頭可以用冇品黎形容！

呢晚，筆者收聽健吾先生代班嘅「光明頂」。題目係近日北海道港人車禍引伸嘅港人駕駛文化，筆者由於工作嘅關係，算係健吾先生定義「常揸車」嘅人，因此筆者對於健吾先生所提及嘅觀點有所共鳴，特別希望在此回應一下，當作係交流一下意見。

香港人揸車唔止係具攻擊性，直頭可以用冇品黎形容。以過線為例子，好多人過線係唔會打燈，總之就係想過就過，你真係睇少一眼都唔得。有啲人呢，會打燈，但打完燈下一秒就過線，完全係一種「我打左指揮燈，你一定要讓我」嘅態度，但係學車個陣，無論係運輸署出嘅手冊，定係教車師傅，都只係話指揮燈嘅作用只係告知其他道路使用者，自己車輛嘅動向，唔係要黎逼人讓你。呢樣嘢冇分係咪搵食，好多揸住架平治/寶馬嘅人（唔係針對，係好多呢啲人都係揸呢兩個牌子）都係咁樣玩法。

其次，的士司機雖說有豐富駕駛經驗，但係意外事故經驗亦相當豐富，呢個唔係所謂「結婚率高導致離婚率高」嘅問題，的士司機良莠不齊早已是「常識級」，據筆者平日觀察，十單交通意外，超過半數都有的士牽涉其中。如果得閒睇吓面書有關駕駛態度嘅專頁，的士嘅曝光度，同埋比人問候嘅比率都可以話係數一數二。或者香港地搵食至上啦，不過的士司機嘅食相可謂「衰的經典」。

香港人做乘客可以話係冇責任可言。唔知係咪香港職場文化使然，總之唔係自己落手落腳，就彷彿唔需要負責。筆者女友曾經講過一句說話令筆者好深刻：「我只係坐車㗎咋，我咩都唔知㗎。」就筆者日常工作經驗，啲客俾左錢就更加覺得所有嘢都係司機責任，例如司機問佢想行邊條路，普遍都係「你話事啦」，「我唔識喎」呢兩款答案，但其實佢哋先係去目的地嘅人，司機只不過係一個中介（agent)。不過，香港地係俾左錢就大哂，所以只要俾左錢，基本上連條命都可以外判埋出去，自己就乾手淨腳。

講到一邊揸車一邊睇導航一邊吹水。呢啲真係要長期訓練，唔係一般假日司機或者專線司機會明白。或者咁講啦，睇導航揸車多少似睇地圖行山，不過導航就更加多動態，而且揸緊嘅時候仲要計算自己仲有幾多個路口要轉，或者要睇轉左定轉右。其實呢啲技巧係要累積返黎，不過睇人做容易，自己做就難。至於傾偈嘅嘢，筆者為人性喜多言，而且有時揸車講吓嘢，等個腦又轉吓，反而又冇咁易眼瞓。

最後，筆者去外國旅遊，除左台灣（特別係墾丁同恆春）會揸吓綿羊仔之外，基本上會選擇當地公共交通工具。原因有三個，每一個地方交通規例不同，香港法例容許嘅，外國未必得，反之亦然；第二，左肽右肽雖說是鏡面，但係操作上已經係大相逕庭，旅程短短幾日實在難以適應；第三，坐公共交通工具可以睇到更多當地文化同生活習慣，自駕遊雖然方便，但某程度上就似「圍爐取暖」，純粹攞個方便而已。

【嗚巴軼事】

作者：車上人間

一個男人一架車，見盡香港人和事。

閱讀後覺得好，請多多讚好及分享～：）