君子遠庖廚

 

 

講「君子遠庖廚」或者會有人質疑:遠離廚房聽唔到牛嘅哀鳴,唔通就可以心安理得?你食佢嘅肉,唔通唔係因你而死?

喺孟子嘅時代,食肉係一種特權嚟,唔係好似而家咁係一個「choice」。我懷疑喺嗰個年代,營養學冇咁發達,農作物冇咁多種類,唔食肉可能會有少少營養不良。何況(斷估)士人階級喺禮儀上都要食肉,唔通上頭送盤肉俾你食你同佢講你係vegan咩。

所以士人完全唔食肉係唔得嘅。但係同時間,孟子又鼓勵君子要有惻忍之心,聽到牛嘅哀鳴食唔落嘢先至算係有人性。咁兩件事擺埋一齊豈不是教人要「虛偽」?

狹義嚟講可以話係「虛偽」。但要記住,儒家講「君子」唔止係培育私德,更重要嘅係論述「統治階級」應有嘅行為同品德。統治階級唔單止食肉會殺死動物,佢哋每一個政策,都會喺惠及某啲人嘅同時,犧牲其他人嘅利益。世上絕少政策係令所有人都happy嘅,幾乎每一個政策都係一個 trolley problem。

例如話,敵國入侵,作為國家統治者,你叫士兵守禦,已經係犧牲士兵嘅安危,去保護其他國民嘅性命財產。孔孟話君子要有仁心,唔好無端興戰,但真係冇辦法要打嗰陣,惻忍又如何。唔想滅國嘅話,亦只能夠發揮「君子遠庖廚」嘅精神,瞇埋眼當睇唔到。

儒家嘅態度係務實嘅,唔會同你講人人平等。親疏有別,孔孟只會叫你推己及人,即係諗咗自己先,再諗下其他人。真係要取捨嘅時候,一個合格嘅統治者係要有惻忍之心嘅同時,可以果斷咁對一啲 trolley problem 定案。喺呢啲時候,「君子遠庖廚」嘅做法就係冇辦法中嘅辦法。

順帶一提,呢啲都係相對於「大愛左膠」嘅「本土論述」嚟。作為香港人,對於外地嚟攞福利嘅人,我哋無疑係要有「惻忍之心」。但如果資源唔夠,「老吾老以及人之老,幼唔幼以及人之幼」,梗係養好香港自己人先再諗其他人。如果外地嘅人真係咁慘,合格嘅統治階級都只能夠「遠庖廚」,而唔係無止境咁同情佢哋。

所以話,本土嘅論述,真係唔係去 JSTOR 度搜尋 keyword 就搵到。大家都係中國人,冇咩理由連《孟子》都唔識。好似係。

 

作者:散彈一號

散彈一號
全職文字工作者、應用哲學家。對「邏輯一致性」、「系統複雜度」之類的偏門學問獨有心得。在美利堅合眾帝國邪惡資本主義集團的領導下,嘗試改變世界。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 188745
Date: 2018-12-30 03:38:12
Generated at: 2020-11-29 09:37:10
Permalink: https://www.vjmedia.com.hk/articles/2018/12/30/188745/君子遠庖廚