【嗚巴軼事】鬼佬鬼婆上車又咀又摷十分鐘，目的地係科大教職員宿舍. . .

話說，大概係上年九月、十月份左右嘅一個星期日晚上，筆者係尖沙咀香格里拉酒店接左一個鬼佬同一個鬼婆，個鬼佬同盛智文差唔多樣，都係光頭。個鬼婆反而印象唔係太深。程車目的地係科技大學教職員宿舍。

就係筆者駛出左香格里拉酒店冇耐，筆者係個倒後鏡見到阿鬼佬摟著個鬼婆，個鬼婆睇落似有啲唔舒服，甚至睇落似想嘔，咁筆者驚佢真係會嘔（嘔左個晚可以唔洗做生意），就問個鬼婆「Are you alright?」點知佢答左一句「I don’t know」就起勢同個鬼佬又咀又摷，而最恐怖係個鬼婆係正常咁坐啦，個鬼佬係半踎係佢前面又咀又摷。（筆者架車內籠大車身高，但出面睇唔覺）

雖然筆者接受程度好高，思想亦都算開放。但突然間面對呢種事，仲要筆者都未試過咁玩法，一時之間都手足無措。而且阿鬼佬咀緊個段時間又唔扣安全帶，仲要唔係坐定定。個刻真係好驚，特別係驚半路遇到「慈母」，筆者呢舖分分鐘仆直。除左同群組師兄講之外，就打去台度求救（不過個台都係廢，叫我勸佢哋唔好喎⋯⋯個刻我揸緊車，仲要唔係一般街道囉）。

成個過程維持左大概十分鐘，由麼地道，經康莊道去到東九龍走廊，差不多咀到入舊機隧先捨得停，仲忽然要筆者加站去彩虹地鐵站（牛池灣消防局行上少少，於是筆者又兜左個大圈。雖然最後有驚無險完左程車，但係筆者成程車就既驚且嬲。最終筆者除左俾一星個鬼佬之外，仲向個台投訴個客，仲要求以後唔再接呢個客（司機係有權blacklist 個客架）。

一個堂堂大學教職員嘅行為真係令人瞠目結舌，「為人師表」嘅嘢筆者真係識條鐵⋯⋯

【嗚巴軼事】

作者：車上人間

一個男人一架車，見盡香港人和事。

閱讀後覺得好，請多多讚好及分享～：）