我最喜愛的男歌手——古天樂的處理手法

商台頒獎禮，事前古天樂因為唱咗半首歌，加上網民力「捧」之下，竟然進入咗「我最喜愛的男歌手」最後五強，果陣已經引起咗大眾嘅討論。點知經過樂迷票選出嚟嘅我最喜愛的男歌手，竟然係個電影明星，更加係令全港樂迷嘩然。我相信琴晚嘅得獎結果一出，無論古天樂本人又好，商台又好，林海峰又好，甚至全香港鍾意廣東歌嘅樂迷都好，都會覺得「仆街，玩大咗。」

但係無論係唔係玩大咗都好，票就投曬，獎亦都準備要頒，係比林海峰寸完一輪之後，古天樂面對著一個連佢自己都唔係好想拎嘅獎，開心又唔係，嬲又好唔畀面，最後佢選擇嘅處理手法，其實都相當有智慧。

一開場，佢用一句「我真係好鍾意唱歌架，不過我唔識唱姐。」呢一句仲要交埋戲，將自己由一個影星嘅身份，拉番入去樂壇，同時，就算幾唔想拎呢個獎，點都要多謝商台先，呢啲基本禮貌，作為行走娛樂圈江湖幾十年嘅人又點會唔識。

然後再自嘲一句「連我都可以行到上台… 我真係冇嘢好講。/我亦都知道，大家最喜愛我嘅，唔係係歌曲上面。」去表達其實自己並唔適合呢個獎。但係，佢亦都可以用自己演藝人協會主席嘅身份，去為香港樂壇去出力，去勉勵一眾台下嘅歌手。聽下聽下，其實成件事已經唔係再玩膠，而係對成個香港娛樂圈嘅新人嘅一個勉勵，希望大家可以攜手向前進。

當然，比林海峰講完一鑊，作為一個影壇大哥，無理由比你林海峰玩謝架，鏡頭一轉，古天樂就趁你一不留神，偷襲林海峰一鑊，只見向來以急才見稱嘅林海峰未料有此一著，面對住咁有分量嘅對手，當堂呆晒，只能夠以「你唔好玩我啦」嚟遮醜，氣氛輕鬆令人嬲唔落之餘，又可以令自己順番條氣。

再之後，林海峰亦都真係冇乜得點還擊，唯有比個台古天樂唱歌，古仔亦都搵咗幾個熟嘅歌手上返台。如果成件事係玩膠嘅， 佢大可以唔唱，又或者自己唱，但係佢選擇咗搵人上嚟一齊唱，起碼令到呢一個舞台比返歌手。雖然成件事係有啲尷尬，但畢竟幾個人全部都無夾過，Run落去有沙石亦都好正常。

同埋，其實古天樂拎獎呢件事都已經夠尷尬，可以大事化小，其實已經好犀利。

作者：麥精維他奶

閱讀後覺得好，請多多讚好及分享～：）