【絕響？】大雞大王牌冇骨雞扒，真心正過豪大大。

以往成日喺葵芳出沒，嗰陣嘅葵廣仲未刻意搞到室內食街一樣（真心覺得以前啲嘢食正啲，冇咁多取巧垃圾，撈麵十蚊七包冇得輸），新都會都未大裝。有一次行經底層戲院嗰頭，突然一陣濃濃炸雞味同辣粉味充斥住我個鼻，原來就係依間大雞大開咗喺度。

嗰期算係雞排店全盛時期，豪大大仲係香港人願意排半個鐘嘅鋪頭，風頭拍得住而家間老虎堂同喜茶。不過豪大大堅持唔切依個風格對於鍾意邊行邊食嘅我嚟講其實唔太好，一路行一路拎住大大件雞扒咬都幾失禮，仲要佢係連骨雞扒，食到最尾真係好鬼麻煩。

大雞大嘅雞扒一嚟比起豪大大叫平（當年好似廿蚊有找），二嚟佢會幫你將本身冇骨嘅雞腿扒剪開一嚿嚿再比兩支竹纖你，食起上嚟就好似煎釀三寶咁方便。對於成日行經嘅我嚟講，佢真係好得我歡心，有時甚至覺得葵廣嘅嘢食都比唔上佢。

只可惜豪大大嘅名氣真係大佢太多，當豪大大可以食住個勢愈做愈有，冇咁出名大雞大都係敵唔過被淘汰嘅命運。自從新都會間大雞大收咗皮之後我一度以往佢已經消失咗喺香港，直到頭先我上開飯喇再搵一搵，先發現原來仲有三間分店，不過兩間喺屯門，一間喺唔就腳嘅葵興（而家都冇幾可經過嗰頭），我諗再去幫襯佢嘅機會都不大。

王牌冇骨雞扒，真心正過豪大大。

作者：毛言地

你有多久沒去找自己的理想？搏殺一天，回到家，倒頭就睡。 無言，只因生存太累。談理想？妄想； 毛言仍言，只因理想，本就是「理應去想」 http://www.facebook.com/MaoYanDe

閱讀後覺得好，請多多讚好及分享～：）