【塔羅個案】個個都話想移民,但係你有無諗過你去到當地點生活?

 

耐唔耐就有客黎問移民相關問題。

當中有一啲喺外國讀左好多年書、亦有一啲本身荷包豐厚,移民對於佢地黎講,金錢上大概唔算係好嚴峻嘅問題;當然,移民一個地方並唔係講緊有錢便事成,想去到當地擁有「生活」而唔係淨係匿喺屋企,當然亦有好多事前功夫要做,例如當地搵工狀況、居住條件、民風習慣下略五百字,絕對唔係「見到平機票就快閃」咁 Chill 嘅一件事。

但係,亦有一部份朋友,想移民,出發點單純得可愛。

「喺香港好悶。」
「香港唔好呀,生活唔到呀。」
「唔係好知自己想做乜,黎黎去去做爛鬼文職,無咩變化。」

不得不提,未開舖正式搞塔羅之前,我都係一個做「爛鬼文職」嘅平凡 OL,最討厭數學的我,工作每日都在計數;係嘅,我明,日復一日重覆一啲自己不感興趣嘅工作,真係「打份工、逗份糧」,最期待係 Weekend 或者任何放假嘅日子。至於將來,前途,唔知呀,搵完錢駛錢,多謝屋企有地方比我瞓,僅此而已。

好多人對於在國外生活(國外當然包括埋日本台灣新加坡)總有種期待,有種幻想;怕了香港政治環境的,會嚷著去台北,「台灣買樓平過香港呀」、「台灣唔歸大陸管呀!」,呢種理由,相信你我都聽唔少;當然呢篇文並唔係要探討主權國土問題,而台灣嘅政治形勢有幾「清高」,相信多少有睇點新聞嘅朋友都知,自身難保。

咁然後又會有人出黎講,想避開政治方面嘅影響,就去日本吧,日本風土人情好呀,「我鍾意食關東煮。」,曾經有客人咁同我講,我當時回左佢一句「我都鍾意食」,但我唔會考慮移民日本。日本對旅客以及國民是兩種很不同的態度,當然我並沒有在日本生活過,要了解日本當地生活嘅細節,我諗大家都係去買健吾老師嘅書或者留意佢嘅專頁會知得更多。

當然,亦有人說去英國,歐洲,美國,「呢啲國家文化多元呀!唔排華!」,通常聽到呢度我都係……遠目。唔排華你都講得出。係嘅,你千山萬水離開香港,躲去人家的唐人街,自然就不排華了,但這就是你往後的人生了呀,真的是樂土嗎?真的是安樂窩了嗎?

你可能會話,「我外國讀過書,唔驚」,係嘅,如果你隻身單人前往,你後生你肯跳出 Comfort Zone,機會是給很多有準備的人,我身邊三個要好的朋友,一個經讀書而居住台北,一個經進修工作而在德國及歐洲發展藝術,一個在意大利及英國之間遊走,追夢,謀生。三位都離開香港很久了,但是還沒有一位是正正式式的定下來,手裡拿著的也只是工作 Visa 而已。

要走,不易;走了,人家要接受你,也很難。好多人諗住「香港唔掂我咪走」,走了出去,下一步呢?如果你喺香港已經係「為生活而生活」,咁你去到外地想做乜?便利店?學整章魚燒?移民並不係拍下蘿柚就走,移民亦唔係逃避生活嘅藉口,要知道,無一個地方生活係容易的。

要走,可以,但唔好將件事諗到咁簡單,亦唔好諗住離開香港就會發達、就會有人賞識。有夢是好,但夢做完了還是踏實點計劃將來吧,逃獄都要諗逃生路線啦。

 

【塔羅牌個案分享】

我以為個客擔心病母健康,原來佢只係想快啲分身家
唔係乜野工作都可以上 JobsDB Apply 嘅,例如 DJ 或者 KOL…
男朋友同你求婚,原因唔係因為佢愛你,而係……
因為老公婚宴當晚令到賓客開懷大笑,老婆而家想悔婚(?!)
適婚年齡女多男少,令到部份男士開始 FF 覺得自己條件特別好

 

 

作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 188988
Date: 2019-01-07 19:57:41
Generated at: 2019-09-19 05:26:44
Permalink: https://www.vjmedia.com.hk/articles/2019/01/07/188988/【塔羅個案】個個都話想移民,但係你有無諗過你