有時港女都係港男縱成的——唔止丟自己架,仲丟埋港男嘅架

 

 

「Kristy,你可唔可以幫下我?」Johnny打畀阿琪。

「嘩,Johnny哥,我呢啲龜婆,點會幫到你呀?」阿琪高八度回應。

「對唔住,上次係Mazy唔啱,佢都係太緊張我,先唔小心冒犯咗你唧,求你原諒佢啦。」仆你個街,仲喺度文過飾非。

呢單嘢,要由上個月講起。

Johnny 係一名行政主任,科大畢業,家住居屋,青靚白淨,條件唔差㗎。唯一缺點?就係懦弱囉。唔知係咪佢大學冇乜機會識女,當佢得到女朋友Mazy時,彷如得到新生命一般,完全馴服於Mazy。無論Mazy 幾咁無理,佢都甘願屈服,尊嚴掃地。佢班兄弟甚至話:「條友做男朋友做到成隻狗咁!」

Johnny 大學畢業,Mazy 跟足全程,唔畀佢同碩果僅存嘅女同學合照。大合照時,亦要佢企最邊,唔可以企喺女同學附近。女同學主動過嚟搵佢影相,佢見到Mazy 黑晒面,都立即拒絕。但係,到Mazy 大學畢業,Johnny 竟然拎住部相機,係咁幫Mazy 同男同學攬頭攬頸咁影相⋯⋯

平日同Mazy 拍拖,已經係Johnny 畀晒錢,Mazy 都唔心足。Johnny 月入三萬幾,每個月一萬家用,一萬儲錢,一萬去玩。Mazy 竟然話 Johnny付出太少,唔夠錫佢,平日想食好少少都唔得。你以為Johnny 會屌柒Mazy 拍拖唔出錢?太天真啦。Johnny 竟然cut 家用,由一萬變五千,嗰五千成為Mazy 嘅旅行基金⋯⋯

Johnny 本身有玩球會,同班兄弟打下籃球,Mazy 都要阻止,怕班兄弟帶壞佢喎。Johnny 依然冇反抗,只係偷偷哋去打波。佢班兄弟頂唔順佢,去打下波好似做錯事咁,特登post咗一張打波相上Facebook,再tag 埋Johnny,Mazy先同Johnny 嘈分手。之後?佢班兄弟即刻拉佢去慶祝,再介紹埋畀阿琪識。

「Kristy,呢一位係今晚嘅主角Johnny!佢已經成功同個閪女人分咗手,你快快脆同我介紹啲正常女人畀佢,等佢知道咩先係拍拖!」一位兄弟好開心咁講,Johnny 只有苦笑。

就係咁,阿琪識咗Johnny 啦。

聽完Johnny 吐苦水,阿琪知道Mazy 係癲嘅,管男朋友管到好似奴隸咁。阿琪亦知道,Johnny 都係癲嘅,屌你咁嘅女朋友你都忍到三年嘅?你班兄弟呢三年嚟都對你不離不棄,你真係執到啦。

「其實,你同Mazy 拍拖已經唔係一個願打一個願挨嘅故事,佢已經影響到你嘅朋友同屋企人,你唔理自己,都要理下佢地呀。何苦呢?」阿琪問。

「人在江湖,身不由己啊⋯⋯」Johnny一臉哀愁。

「頂你咩,冇人揸住枝槍逼你同佢拍拖㗎。唔好講到自己冇責任咁啦。」阿琪好直接咁講,Johnny 冇反駁到。

阿琪再話:「對唔住,我知我講得好刻薄。我想你明白,過份縱容另一方,會令佢恃寵生嬌,對大家都唔好㗎。」

「唉,而家分咗手,再講都冇用。」Johnny話。

「好啦,唔講呢啲啦。下星期我有party,你都一齊嚟玩啦,我有好多女仔friends都會出席㗎!」就係咁,Johnny就出席咗阿琪嘅party啦。

阿琪慨嘆,Mazy只係一個例子,仲有一部分港女係好喪㗎。而Johnny 之前咁縱Mazy,唔止丟自己架,仲丟埋港男嘅架。唉。

 

 

作者:霏子

霏子
Fayly .Party Host .不務正業、自甘墮落 .香港大學主修文學及文化研究

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 188982
Date: 2019-01-08 16:23:21
Generated at: 2020-02-29 11:04:00
Permalink: https://www.vjmedia.com.hk/articles/2019/01/08/188982/有時港女都係港男縱成的-唔止丟自己架,仲丟