「你想織咩款？嗱，呢度有幾本書，你揀啦，之前有無織過？」阿嬸說。
「無呀第一次織。」我說。
「咁你都唔使睇書喇，織呢款啦最簡單。」阿嬸說。
「簡單得嚟有無其他款揀？咦，呢條好靚喎！」我說。
「我教你織無所謂呀，睇你學唔學到咋，上咗一堂先再講啦。」阿嬸說。
話說阿Mike就嚟生日，我就諗住親手織條頸巾畀佢，但係我份人無乜耐性，手工又唔叻，唯有畀錢出去學。第一堂好快就揀好冷，摸落好舒服，應該係羊毛嗰啲，不過好鬼死幼，我已經心知不妙。一坐埋位阿嬸就即刻試範點樣開針，織得勁快我完全唔知發生咩事，跟住我又緊張症發作，手汗都出埋，搞到條冷一條化開咗幾條，勁難織，啲手指又抽筋咁控制唔到，阿嬸一邊叫我唔好咁緊張，一邊重覆佢摩打手嘅動作，我估佢以為我有卡卡西嘅寫輪眼，一睇就複製到。
學完開針就學低針，免強叫做學識咗，佢仲讚我學得快，教埋我高針，之但係我學完之後就亂晒，要我織高我又織咗低，佢話低針係一條辮仔，高針係一粒嘢，我完全睇唔出囉大佬，然後佢叫我返屋企好好練習，其實上完兩個鐘堂我已經覺得肩頸膊痛，有啲作嘔，好似暈車浪咁，真係想放棄唔織算。
返到屋企我就好努力練習，可惜成日都織錯，錯咗又唔識補救返，一錯就要拆晒，不停拆同織，啲冷都披晒口，唯有再睇下youtube啲片，睇清楚啲步驟再織。練熟就去上第二堂，佢教我織一個款，教完無幾耐就話要開始織，開48針，我每一行都有錯，啱啱學都未練熟，同時間有另一個女仔嚟上堂，佢話好耐之前織過，今日再嚟學。
「人哋嚟上第一堂咋，已經識晒開針高針低針喇，你仲係咁錯。」
「睇下人哋幾快上手，仲要無錯，織得好好。」
「人哋都識得托住支針，你都唔托，托針呀！」
我梗係唔識先比錢嚟學，識就唔使嚟搵你啦，每個人資質都唔同，可惜有啲人淨係鍾意教叻人，因為佢哋一學就識，然後就會覺得自己教得好好，真係去到邊都要畀人拎嚟比較，人比人，比死人，加上我又真係成日織錯，搞到好錯敗，佢又無教我錯咗可以點做，話我現階段都唔識睇，淨係話織晒呢舊冷先好返去上第三堂。
我返到屋企織咗幾針之後發現又錯咗，真係好無奈，只可以停咗喺度等人救，但上堂嗰度好遠，下下返去車錢都好甘，好彩原來有個朋友嘅媽咪都識織，於是我就成日上去打搞人，有幾次突然甩手成支針跌咗出嚟，真係心都離埋，好彩到咗後期，我已經無乜點織錯可以自己喺屋企慢慢織，如是者織咗個幾月就完成咗條頸巾，真係有血有汗，不過呢條頸巾係我人生嘅第一條，亦會係最後一條。。。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2019年1月8日
