Mike 有一個宗旨，就係無論幾夜，幾遠都一定會送我返屋企，拍拖幾年嚟只係有一次無送，對女性朋友嚟講，呢個可以話係一個奇蹟，因為而家好少男人會堅持每次都送女友返屋企，大佬搭車唔使錢咩，如果住得遠，一來一回仲嘥好多時間，而且出完街通常都夜，攰到死，唔係仲要我送你掛？而對於男性朋友嚟講，呢條友簡直係做壞規矩，寵壞港女，令其他巴打難做。
「其實你真係唔使次次都送我返去，我哋傾住電話咪得囉。」拍拖初期我說。
「我送你返去都係當拍拖咋嘛。」Mike笑說，我心諗佢真係好鬼識講嘢。
「唔係呀，你聽日仲要返工，你送完我再返去都成點幾兩點。」我說。
「得啦，我而家送你咋，拍拖耐咗唔送㗎喇，好好珍惜。」Mike說。
當時朋友阿明都說：「哈！睇佢送得幾耐，我就唔信佢一世都送你！」然後眨下眼已經過咗幾年，中間我哋試過因為討論「送唔送返屋企」呢個問題而鬧交，佢因為擔心我堅持要送，我唔想佢咁辛苦堅持唔比佢送，無聊至極，但係拍拖有時就係會因為啲雞毛蒜皮嘅事而嘈，呢啲都算係兩個人相處嘅一部份嚟。
「你咁夜真係唔好送我返去喇，係人都覺得我好港女，咁夜都逼你送我返去，虐待你咁。」我無奈地說。
「其實你唔使理人點諗㗎喎，你同我拍拖啫，又唔係同佢哋。」Mike若無其事地說。
「OK you win，我永遠都唔夠你講。」我說。
其實每對情侶都有佢哋嘅相處方式，送唔送返屋、生日有無比驚喜、有無成日鬧交等等絕對唔係一個標準去量度你哋嘅關係有幾好或者唔好，更加唔需要去同其他人比較或者解釋，兩個人嘅事，就留返比兩個人去處理，因為一介入咗其他人嘅想法，有時反而會變得更覆雜。
我哋兩個嘅性格都好唔同，佢係想做就會做嘅人，從來都唔會理其他人點睇，而我就係船頭驚鬼船尾驚賊嘅人，諗完一大輪先肯踏出一小步，然後一有少少錯折就即刻縮。兩個人一齊係會有互相感染嘅能力，係佢令到我呢幾年嚟都可以勇敢去試唔同嘅嘢，因為佢永遠都會話我係最好，比信心我去做我想做嘅事，無論係失敗定係成功，佢永遠都咁支持我。
至於點解我又寫千字文？本身我係寫好咗諗住等佢求完婚就post，諗住公開讚下佢，因為我知佢一向都鍾意高調，但我又偏偏鍾意收收埋埋，可惜而家個結尾需要改改。
「衷心希望我同你喺將來都可以搵到一個更合適嘅人，亦多謝你呢幾年來對我嘅照顧，再見。」
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2019年1月9日
