唔好成日話港女拜金，身為朋友最難頂嘅其實係蠢女人

愛情真係好難理解，娟姐精神上做咗四十幾年人都未理解到，網民成日話港女拜金，用西當八達通嘟，今日要講一個幾近滅絕的稀有品種：蠢女人。話說早兩日有條女話想借錢找卡數，問多兩句，原來同個ex復合咗，然後請人哋去中環米芝蓮西餐開酒，聽到我黑人問號以為自己唔識聽中文。

呢個女仔朋友細細粒，眼大大，個樣幾得意，次次訴苦都喊到落雨咁，姑且先稱佢做雨妹。雨妹斯文打扮，少化妝，由讀書到而家係coffee shop沖咖啡，都有唔少人溝，但外表睇唔出的，就係蠢。講蠢（or 無知啦下），算係娟姐識的人中Top 3，例如真心讚梁振英係好爸爸好特首，唔明CY做咩成日被人鬧；射波個日玩candy crush 然後邀請上司一齊玩；覺得老闆唔扣飯鐘錢好好人；買點數卡比Line 白撞的人（多過一次）；同埋識咗佢個ex。（拿，雨妹係蠢，但心地好，對人好好，又成日做義工）

話說雨妹同ex同居咗五年，已經經常同圍內幾個朋友訴苦，係咁數條仔啲缺點：三十幾歲人搵萬七，碌卡淨係還min pay，條數加加埋埋六位數；成日同老母講好憎雨妹；成日同FRD講雨妹脾氣差，捱得好辛苦；次次出街食飯同去旅行都唔比錢；成日帶人返屋企偷食。聽到呢到，娟姐忍唔住問：「好心你對自己好啲啦。你條仔好靚仔？份工好掂？碌撚好大？」然後雨妹擰頭話：「全部都唔係，初戀呀嘛，初戀費事分手啦。」由於佢都講到話「費事」分手，雖然都替佢不值，但一直都係聽下就算，唔比咁多意見。

直到半年前，雨妹又喊住打電話來，話覺得同條仔一齊無未來，分咗手。見到雨妹醒覺咗，娟姐當然馬上恭喜，然後一齊去飲杯，第二次佢好似重獲新生咁搬返屋企，每日係ig上載caption「一個人也可以很堅強」的自拍相，然後又同我地些牙被仔追啲開心事，我地都幾安慰。

Diu 點知早兩日雨妹打來，話碌爆咗卡，無錢找卡數（白眼反到腳跟），原來，請咗個ex去L’Atelier de Joël Robuchon，「佢wtsapp 同我講生日快樂，估唔到分咗手半年佢仲記得，我地一齊咗五年，近三年佢都無同我慶祝過。」今次娟姐真係聽到😳🙄🙄🙄😑，命都短幾年，「你平時譚仔加蒜泥白肉都諗好耐…做咩去食咁貴嘅西餐？」「佢話想試喎！」（白眼反到好辛苦）咩女人會買單請男朋友同自己慶祝？搵萬二蚊請條仔食5,000飯然後無錢找；咩女人會因為ex一句生日快樂就復合？係有你心，就唔會拍拖有三年都唔記得你生日…除咗蠢，娟姐都搵唔到詞語形容雨妹，唯有問多句：「佢成日偷食喎？」雨妹曰：「識返屋企就得。」

頓時，娟姐有感，過去五年聽佢訴苦，好似浪費人生咁。又諗，或者條仔上世做好多好事，今世得女如此，於是直道：「恭喜哂！學你條仔還min pay 囉！」然後，今日放工我係金鐘見到佢條仔攬住個肥OL。

作者：觀塘方麗娟

閱讀後覺得好，請多多讚好及分享～：）