講嘢叻嘅人真係咁多咩？講出嚟之前不如寫出嚟先啦！

好多人成日都高估自己嘅能力，其中一點最常見嘅，就係以為自己指示/講嘢好清晰。一個人由細細個到離世認識嘅人入面應該有八成人都有呢種毛病，但係被你發現嘅可能只係當中嘅三成到，原因就係通常呢啲毛病係要喺一啲複雜啲嘅話題上先發現到。喺咁嘅條件下，呢啲毛病最易發作嘅地方就係喺大學同埋職場。

而通常有呢種毛病都不外乎三個原因：
1）份人仆街，連同你講多句都覺得嘥時間——唔係講到咁你都咁撚蠢唔明呀嘩？
2）表達能力不足，通常一係唔識字，詞不達意，一係連組織都冇組織好就係咁講。
3）根本就係人蠢，連自己諗緊咩都唔知

第一種原因係無可救藥，又或醫返都嘥藥費。

而第二種同第三種，我聽佢哋講嘢時，真係好想叫佢哋不如寫落嚟畀我睇啦，唔好嘥我時間，但係通常呢兩種人係唔會肯寫嘢㗎，因為佢哋覺得自己講到寫唔到。

呢個正正就係問題，一個人會講到寫唔到，只有兩個可能，一係好似蘇格拉底咁，係個文盲；一係就係隻手有病，寫/打唔到字。

而喺香港地，又有幾多人有呢啲缺陷呢？因此，實情就係根本大家係「講唔到，亦都寫唔到」。可悲嘅係，大家成日以為用把口發出啲聲音，噏下啲字眼就係講嘢，但係言之無物，只係噪音而已。病情較輕者，可能真係講得到自己嘅觀點，但係就冇諗過自己嘅觀點根本經唔起推敲。

呢個時候就更加要寫出嚟。歸根究底，寫出嚟有四樣好處：

1）白紙黑字，冇得淆——同呢啲人講嘢，最辛苦嘅就係佢哋往往講嘢含糊，甚至前後矛盾，但係當你指出時，佢哋就會一味話你誤解，話你唔明白，佢唔係咁嘅意思。寫咗出嚟，你出嚟拎出嚟對質，如果佢唔認，仍然話佢唔係咁嘅意思，你就可以問佢「咁點解你唔寫埋出嚟呢？」

2）寫出嚟比講出嚟更費心機，因為如果你寫嘅唔係bullet point，而係essay，咁喺點與點之間你就要花大量筆墨去連結佢哋，而連結佢哋對邏輯嘅要求更高，令人發現自己以為「講得通」嘅嘢，原來根本寫唔通。佢一係就寫通佢，一係就係根本連討論嘅價值都冇。無論結果如何，你都慳返唔少時間。

3）寫嘢嘅成本比講嘢高，人講嘢可以唔經大腦，寫嘢就唔可以，所以喺寫之前，人就已經會審思呢樣嘢值唔值得自己寫，變相亦減少亂噏嘅情況發生。

4）對呢啲人而言，叫佢哋寫出嚟根本就係一種折磨，因為寫嘢本身就係一種同自身嘅對話，人往往要模擬點同人講嘢以寫到出嚟，而當中嘅對象自然係自己啦。佢哋亦都可以由此明白其他人聽佢哋講嘢有幾辛苦。（同時亦都解釋到點解寫出嚟對第一種情況嘅仆街係冇用，因為佢哋會認為同你哋講嘢先係最辛苦，佢哋自言自語不知幾舒服）

總結而言，大多數嘅講嘢唔清晰其實都係歸因於自己思維有問題，但係啲人往往會歸咎於其他原因，只有叫佢哋寫出嚟，佢哋先可以面對自己嘅問題，同時亦都會明白其他人聽佢哋講嘢有幾咁辛苦。而且寫出嚟唔單單對啲呢班粉腸有幫助，就算你係嗰兩成表達清晰嘅人，其實寫出嚟對你嚟講都有好處。寫作本身就係一種思考，寫出嚟可以令你諗清諗楚。如果你可以寫好之後，擺返幾日，再拎出嚟睇一次，你總會發現有啲位或唔夠清楚、或唔夠嚴謹，有審視自己嘅作用。所以大家講啲複雜嘅嘢之前，不妨都寫咗出嚟先。

作者：哲學仔

一條哲學廢青

閱讀後覺得好，請多多讚好及分享～：）