有時港女都係港男縱成的——唔好以為你要錫女朋友,就可以咁玩另一位女仔。

 

 

上回講到,Johnny 同Mazy 分手,去咗阿琪嘅party 識女。Johnny 本身條件唔錯,去到好快識到女,嗰位就係Belle啦。Belle 份人正常好多, Johnny 同佢約會都開心嘅。佢地仲約咗一齊去阿琪個Christmas Party,到時交換禮物𠻹。

但係,到咗Christmas Party,Johnny 竟然唔見人。Belle 仲發現,Johnny 似係block 咗佢。Johnny 班兄弟嚟到,即刻好燥咁話:「Kristy,睇怕Johnny 今晚都唔會嚟㗎啦。原來呀,佢一直同Mazy 藕斷絲連,仲有見面!慌死唔係Mazy 怕冇咗呢個荀盤,而家想復合咩!」

屌!阿琪即刻打畀Johnny。第一次,打唔通。第二次,佢用另一個號碼,等一陣再打過去,佢先聽:「喂?」

「你係咪同返Mazy 一齊,就玩失蹤?」阿琪劈頭就問。

「對唔住呀Kristy⋯⋯」

「你自己上嚟同Belle 解釋清楚,唔好以為block 柒佢就乜事都冇。人地仲買咗禮物同你交換,坐喺道等你。」阿琪cut 線。

阿琪好嬲,你寵愛Mazy 係一回事,尊唔尊重Belle 係另一回事。唔好以為你要錫女朋友,就可以咁玩另一位女仔。

阿琪只好同Belle 講:「對唔住呀Belle,我估Johnny 應該同返佢之前嘅女朋友一齊,所以冇理你,佢今晚未必會嚟㗎啦⋯⋯Sorry,介紹咗個咁嘅人畀你。」

「頂,總之唔買畀佢啦。不過我冇嘢嘅,同你地一齊玩囉。」好彩Belle 係開朗嗰type,個氣氛先冇咁尷尬。

玩玩下,Johnny 竟然嚟咗。佢班兄弟好開心:「喂Johnny!幾驚你嚟唔到呀!Belle 等你好⋯⋯」話口未完,Johnny 後面出現Mazy。

「屌你⋯⋯」班兄弟低語。阿琪即刻上前,準備屌柒Johnny——

「你就係個龜婆呀嘛?搞埋啲唔三唔四嘅party,成個雞竇咁,傷風敗德!」估唔到阿琪未開口, Mazy 已經展開攻擊。嗰一刻,阿琪真係還唔到口,因為佢冇諗過會俾人話龜婆。

「喂你講嘢尊重啲好喎,我地唔係你條仔,可以俾你撚狗咁撚。」班兄弟出聲。

「Johnny,你冇心嚟玩,又何必上嚟踩場,掃大家興呢?」Belle 上前同Johnny 講。

「你收聲啦,明知人地有女朋友,仲想做人第三者,姣婆!」Mazy 攔住Belle,指住佢嚟屌。吓?小姐,你地當時分咗手㗎啦喎⋯⋯阿琪真係組織唔到呢條女嘅思路。

「喂你——」俾人話係姣婆,Belle 激到痴線。

啪——估唔到,Belle 未發火,Mazy 已經一巴掌打咗落去:「你咩你呀,我打你都仲得呀!死姣婆!」Mazy 完全暴走。

「喂你做咩打人呀!話咗上嚟講清楚就走㗎嘛!」Johnny見狀,驚到仆街,拉住Mazy 走。班兄弟本身想捉住Mazy,告佢傷人,但Belle 竟然話唔使,因為傷勢唔嚴重,又冇證據,警察最多勸佢地和解,嘥大家時間。

嗰晚個Christmas Party 就咁柒咗。

不過,Belle 都唔係省油的燈,佢出咗封律師信畀Mazy,實際作用不大,已經嚇到Mazy好驚。佢即刻叫Johnny 去搵Belle 求情,結果Belle 緊係屌柒佢啦,求情都要男朋友去求,你唔好再冇誠意啲?

Johnny 冇辦法,咪唯有搵阿琪囉。

「Johnny 哥,你搵我冇用㗎,我呢啲龜婆,傷風敗德,幫唔到佢。」

「Kristy 姐,對唔住,我會陪Mazy 向你地道歉,但你可唔可以幫我,向Belle 美言兩句?」Johnny 喊晒口咁講。

「你條女識玩呀,好得罪唔得罪,係要得罪Belle 姐。人地表叔大律師嚟㗎,仲要識好多人,你地自求多福啦。」阿琪冇心情再理一個冇骨氣嘅老婆奴,收咗線了。

最後,Belle 冇告到Mazy,不過Mazy 俾人炒咗。

世事就係咁巧合。原來Mazy 係做PR嘅(屌你咁嘅性格都做PR),Belle 個表叔竟然識得Mazy 個大老細,直程開口叫大老細炒咗Mazy。就係咁,Mazy 冇得撈啦。

不過唔緊要啦,阿琪知道,Johnny 一定會繼續做一百分男朋友,好好養住Mazy 㗎,係咪?

 

作者:霏子

霏子
Fayly .Party Host .不務正業、自甘墮落 .香港大學主修文學及文化研究

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 188984
Date: 2019-01-11 04:04:14
Generated at: 2020-02-17 03:32:17
Permalink: https://www.vjmedia.com.hk/articles/2019/01/11/188984/有時港女都係港男縱成的-唔好以為你要錫女朋