【嗚巴軼事】我問乘客：「係咪靠左行？」，我以為答案得係或唔係

早兩晚，筆者係機場接左個客，個客去置富花園。沿途個客都正正常常。點知差唔多到終點站都要有蝦碌嘢⋯⋯

話說筆者已經去到薄扶林道轉入置富道，個位係一條上斜嘅分岔路，靠左行會去置富花園，靠右兩條路一直去入薄扶林花園；轉右過橋行返轉頭落返堅尼地城。由於個客點落車嘅地方好顯然係馬路邊，唔係「入村」，咁筆者好心問個客「係咪靠左行？」

個客答：「轉上去。」

於是筆者理解做「轉右上」，去到分岔位個客先話：「唔係，係轉上直去（筆按：左面條路）」筆者當堂吹脹，好彩停得切，否則就恨錯難返。但係筆者要倒車就佢，後面仲要有架紅的，尷尬到爆。最好笑係個客仲要覺得自己冇問題，仲話筆者行錯路。見佢態度唔算太差，今次筆者俾三粒星（筆者覺得自己好厚道）。

筆者都好疑問，到底係筆者問得唔清楚？還是筆者理解能力有問題？淨係問係咪靠左（答案只有「係」同「唔係」）都可以蝦碌到咁，香港人真係夠哂經典⋯⋯

【嗚巴軼事】

作者：車上人間

一個男人一架車，見盡香港人和事。

閱讀後覺得好，請多多讚好及分享～：）