我的西面隊友

作為一個打波嘅廢J，無顯赫嘅身高，無華麗嘅球技，情況就似一個又唔靚仔又無錢嘅小毒毒一樣，一係就俾人漠視，一係就積極做兵討好一班次次練波打波都對住你西口西面嘅娘娘。

真係唔好講笑，做兵都要講資格，不經不覺幫佢地執左16個月波，執波多過練波嘅我就算毫無怨言都好，執波如果唔係狗衝住去搶黎執，娘娘們塊面仲黑過包青天。

另外做兵最重要嘅工作，當然係喺娘娘心情唔好嘅時候鼓勵佢地啦。平時全程一路嗌「加油、再黎呀、Aces⋯⋯」已經司空見慣，特別係娘娘狀態不佳嘅時候，你哩個時候如果無即時嘅無限量「唔緊要呀、再黎、頂住呀、你做到架、你做得好好呀、靚波呀⋯⋯」，你就等俾人西到2046。

話說有日比賽，狀態不佳嘅娘娘們已經西風滿面，當我喺場外安分守己打氣之際，教練突然叫我落場，心諗今次本兵肯定兇多吉少，說時遲那時快，失左幾球後娘娘開始黎料，小兵愈失波愈緊張，愈緊張愈失波。無鼓勵嘅球場，只有一班黑口黑面嘅隊友同戰戰兢兢嘅我，場波輸左幾多我已經冇印象，但果種「你唔係咁都打唔到呀嘛」嘅埋怨神情同仇視我嘅眼神一直深深印喺我腦海中，唔講仲以為我欠佢幾百萬。

幾日後隊友們開咗個互插大會，講就講互插，實情就梗係我被插大會啦！一開始，大家就單刀直入⋯⋯

面對佢地嘅指責，我都預左係硬食。突然佢地鬧到咁上下，想聽下犯人嘅自辯。

愛西娘娘：「我哋講咗咁多你零存在感，點解你可以冇反應？你有咩諗左架？」
我：「其實我有特登出多左聲，嗌多啲⋯⋯」
時西娘娘：「我聽唔到囉，你嗌俾自己聽無用架，同埋你可唔可以唔好再搵藉口俾自己！咩叫多左先？由嗌三聲變嗌四聲呀？」
暗西娘娘: 「其實新人（未西娘娘）都有哩個問題，不過佢勁所以問題不大，你咁X廢仲唔X出聲就唔得囉！另外，你最初真係好X廢，我都唔明點解會俾你入黎。你的確比起果時有進步嘅，因為你當初真係好X廢，但你嘅進步速度好慢囉。我地哩度冇時間俾你hea呀！」
愛西娘娘：「仲有呀，你個人真係好慢，我次次見到你黎換鞋果時慢慢綁鞋帶我就扯火！」
我地插左你咁耐，你唔嬲架咩？點解唔講野？其實你咩心態？你唔肯講野唔願意同隊友溝通我都逼你唔到！你自己諗清楚啦！

總之一句：「你講就係搵藉口、不知悔改、唔肯反省，唔講就係唔上心唔肯溝通」。情景就好似女仔鬧個男朋友唔上進、點解買唔到樓、點解儲唔到錢、點解人地得你唔得、點解做黎做去都未升職加薪咁。其實我都想問一句：點解我無富爸爸。

最誇張嘅係，另一位娘娘俾人話佢每次都遲到，而佢嘅解釋係因為自己好需要做Facial呀、修甲同埋要上瑜伽班去維持身段，已經盡快趕黎。面對呢啲唔成理由嘅理由，娘娘們竟然點頭深表明白咁，我果刻真係十個黑人問號，唔通真係your face your fate。

面對佢地嘅指控，其實我有啲無力，就好似一個魔術師將所有魔術表演完之後，觀眾仍然好不滿地繼續要求變新魔術出嚟。我不停反問自己，堅持落去嘅理由係咩，同埋面對完全唔欣賞你付出嘅人，應唔應該放棄⋯⋯

腦海中突然諗起一句歌詞： 當愛剩餘無窮忍受 手挽著難纏如手扣 當你又對我說出要求 背影都跟你走

在此奉勸各位高質娘娘，可能你嘅完美主義、高要求可以令你有一個更完美嘅男朋友，但係都請你嘗試下去欣賞同感謝身邊果個為咗你一直努力而又無怨無悔嘅男朋友。真心，嘗試下都好呀。愛情亦然、人際關係亦然，當你無理所當然化人哋嘅付出，你嘅情緒、你同人嘅關係、你嘅情路或者會更好。

作者：壞孩子

壞孩子不會永遠出錯。 我多愁善感，就是喜愛用文字來表達心中的細膩，你愛也好，不愛也罷，我就是我。Facebook Page：www.facebook.com/giuiti

閱讀後覺得好，請多多讚好及分享～：）