【我有個福建奶奶】婆媳溝通最緊要有老公做神隊友完美KY

 

 

婆媳關係彷彿係一道可永恆討論話題~婚前,已經有不少好友對我提出友善忠告:「嫁咗之後,記得小心處理婆媳關係,加埋佢哋啲福建思想… 唉,你想個老公好過啲,就記得咩都要忍啦。」開初我不明所以,婆媳關係真係咁難搞?福建人又點呢~咪又係人一個,無理由處理唔到嘅~但到坐埋一齊開始傾婚禮席數開始,我承認,之前太輕視99嘅「魔」力…..

又要先旨聲明,呢篇文其實想讚揚神隊友,與99及對其觀感無關㗎下~

相信有唔少準新娘於未入門時,都聽過準6299講:「放心,嫁到入來,我哋會當你係囡咁錫㗎啦~」放屁啦!你唔係真係諗住6299會好似親生老豆老母咁錫你呀嘛!以下係其中一個相信有好多人都會經歷過嘅例子…..

 

討論婚禮酒席 真係唔好帶埋未來老婆出去

於4、50年代香港仲未盛行「兩個就夠哂數」,好多老人家都驚自己啲仔囡養唔大,加上避孕意識又不足,呀爺呀嬤呀公呀婆又可能無咩閒餘活動,咪搞到生咗一大群呀叔呀伯姨媽姑姐出來,再加埋班表弟妹後裔,講真,本人平日家庭聚會若兩家「近親屬」坐埋,都需要接近10圍先搞得掂。

可能福建人嘅節儉意識太強(又或者真係太過擔心呀仔搞唔掂啲錢啦),加埋講嘢聲調及文化問題,一聽到女家需要酒席圍數超出預期已經拍哂枱,於公眾場合大聲質問以下問題幾次:「點解要請埋你啲呀姨去飲!?你點樣保證人哋會比足人情你!?」

果刻簡直燥到一個點,好想回應一句:「呀未來99,果啲係由細錫到我大嘅屋企人,唔係路人甲乙丙……可唔可以尊重下佢哋?仲有,咩嘢叫保證人哋會比足人情?你叫我點開口問?係咪痴線?」

放心,我忍住咗道氣,唯有用最大嘅包容心去不停解釋。(後尾先知原來大陸人真係會一家大細去飲,但只係比200蚊甚至更少嘅人情。我明,我真係明。但Sor9, 呢到係香港…唔係大陸呀!!!!!救命~)

「我唔怪佢,因為文化唔同。」我內心不停咁同自己講。

即使付出耐性與99溝通,但於整個交談過程,望住99同老公全程用一種我出盡奶力去聽都聽唔撚明嘅閩南話交談,加上老人家激動到用超大語調講嘢,大聲到集中哂成間咖啡店嘅顧客目光,然後再望住99身體由面對住我,再向左調45度,講多陣再向左調多45度,去到最尾直頭用成個背脊「得」住我,果刻無論再堅強都好,淚已經忍不住流落來。

「唔好怪佢~文化唔同~觀念唔同~老人家係咁~」我內心不停咁同自己講,但當刻已經喊到講唔到嘢,難堪到要去借尿循避一避。

我心諗:「做咩啫~又話嫁到入來,會當我係囡咁錫嘅?而家生於大家族,我想㗎咩?女家除咗禮金之外,婚禮所有支出唔使你比㗎喎,人情全數拎番出來比酒席錢喎,擺酒就哂你擺酒樓啦喎,仲想點Jack?做咩要當眾罵我啫,咁大個囡都未試過比Daddy Mommy咁大聲係公眾場所到罵我,佢哋都唔會用個背脊「得」住我!你做What啫~」

唔開心咗好耐、好耐,加上婚前見識過6299某啲行為,令到我產生無數次唔嫁嘅念頭,經過三番四次嘅拉鋸,再見到隊友因知我受委屈後而表露出無比內疚嘅樣,查實佢應該比我更愁更累~

要知道好多99都會覺得,個仔要娶老婆另組家庭,噢!你想搶佢忽肉!你想同佢爭仔!所以對你要求高,諸多挑剔,正常呀~
加上原生家庭問題,無人關心佢,咪將全部感情都寄託哂自己個仔到,唔比呀仔忽略佢,要痴到實一實,正常呀~
每次上來之前都唔會打電話通知,佢來揾個仔同「佢」個孫啫嘛,又唔係探個新抱,呀仔屋企,即係佢屋企,做咩上「自己屋企」要打電話同你預約?係佢角度來講,都係正常呀~

 

家中必備潤滑劑 主動協助另一半融入家庭

講真~呀99忽然間要同第二個陌生女人,分享生命中最重要男人嘅愛與時間,個心唔舒服、唔習慣,真係正常嘅。於呢個時候,不得不讚揚神隊友,佢就好似枝KY咁,作為我同99之間溝通橋樑,主動幫我融入自己家庭,而不是幫着家人排斥我。

可能你會話,邊去到排斥咁嚴重,先唔好講其他,就以對話、溝通來討論。溝通係一門藝術,但如果連對方講嘅嘢都聽唔明,又何來溝通呢?儘管已經表示過好多次,聽唔明佢哋啲閩南話,希望99可以於我面前用番廣東話溝通,以免搞到自己成個外人咁,感覺好難受唷~縱使99繼續借咗聾耳陳隻耳,神隊友都會用佢最大嘅耐性同99解釋我嘅難處,希望佢可以盡量配合下。

講真,算係唔話得啦~

你可以話:「車!咁你唔去學閩南話就番佢!?」個問題係,大家都識聽、識講廣東話,無事不可對人言,如果無傷大雅、又唔係講秘密、又唔係要佢從新去學過另一種語言的話,又為何要將「溝通」呢件事變到咁複雜呢?(0拿,我有聽蘇打綠啲閩南歌學閩南話㗎!不過真係好難學呀嘛 ☹)

 

過濾對方的話 切忌一字不漏轉述

老公作為99最佳聆聽者,其中一環必定係呻家嫂的不是,有好多媽寶,最鐘意將呀媽同仔講新抱嘅不是,一字不漏咁轉述比老婆知,以為兩公婆真係無秘密,結果為婆媳問題加溫,兩敗俱傷。查實作為一個聰明&好嘅隊友,就梗係要將對方嘅說話作出過濾先再傳達啦!以免激發婆媳發戰爭嘛~

呢方面,神隊友做得好好,因為佢每次同99講完電話,都係同我講:「無特別,佢呻下屋企同返工嘢啫。」跟住就會秒速轉話題,或者同呀仔玩,務求分散我注意力。呀99再講你壞話,咪當佢想同個仔撒下嬌囉,目的都係想呀仔多啲關心佢啫。唉,我知係難為了家嫂啦~

 

體諒太太 畢竟唔係於原生家庭長大

慶幸神隊友有易地而處嘅同理心,能夠諒解畢竟我始於唔係於呢個家長大,盡佢所能緩解我面對6299時嘅不自在。好記得有次因為99三番四次作出某種行為而令我喊到崩潰,隊友只跟我就一句:「對唔住,而家你所有嘅唔開心其實都係我令到你咁,你嫁咗入來,無啦啦要你承受我家人某啲理解唔到嘅行為,比啲時間我再同佢兩老好好溝通一下。」

嘩,先來一句誠心嘅「對唔住」,繼而將所有問題、責任自己攬哂上身,把口咁識哄人,仲邊到捨得拎佢來發脾氣啊~

原來愛真係可以戰勝一切(若然你有一個神隊友的話)。正所謂「愛屋及烏」,既然另一半都可以接受你嘅家人,點解唔可以放開所謂嘅原則,嘗試一下接受佢兩老呢?

唉,所謂嘅婚姻,呻下、哄下、就下,咁就一世~共勉豬啦~

 

 

作者:SaSa 戀咁Share

SaSa 戀咁Share
現職某雜誌編輯 & 🐻媽媽🤱🏻 處女座完美主義者,趁仲尚在人世,用唯一小小嘅長處發掘更多世界美好一面👫 https://www.facebook.com/sasalovetoshare/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 189324
Date: 2019-01-17 20:48:48
Generated at: 2020-10-28 04:50:54
Permalink: https://www.vjmedia.com.hk/articles/2019/01/17/189324/【我有個福建奶奶】婆媳溝通最緊要有老公做神隊