「唔使唔開心，我有好多仔，可以介紹俾你識喎。」朋友阿花說。
「我知你多仔，不過唔使住喇。」我說。
「無謂為咗一棵樹而放棄一個森林，你知唔知呀，分手最快復原係搵一個新嘅！」阿花說。
「我知，我明，不過遲啲先啦，元氣大傷要回一回氣呀。」我說。
我唔抗拒認識新朋友，而且都有打算擴闊下圈子，不過如果對方係以搵女朋友為大前題，我就唔想搞人喇，無謂嘥大家時間啦，而且仲要係朋友嘅朋友，你知啦呢段時間最易做錯決定，真係唔好累人累己，有咩遲啲再講。現階段都係積極裝備自己，做運動保持身體健康（其實主要想減肥XD），作息飲食定時，護膚，打扮得靚靚同埋努力搵工。
諗返起以前我連行山都要男朋友扶，少少石路山路就覺得自己會企唔穩，真係有啲誇張，雖然我平衡力不嬲差，不過後來分咗手跟朋友去露營，先發覺原來自己一個揹住啲裝備，唔使人扶其實都一樣行到，就算真係跌親，至多咪起返身，又唔會死嘅。
同時我又係個路痴，以前睇地圖搵路一向都交比男朋友，但係其實而家有google map，點都會搵到路，至多兜遠咗，而且路在口邊，唔識咪問人囉。話晒都就嚟三字頭，係時候要獨立啲，唔好再諗住有人會照顧自己，童話公主嘅夢係時候要醒喇，與其靠人，不如靠自己仲好。
我覺得學識照顧自己嘅第一步係學好煮嘢食，起碼第時自己一個都有啖好食，雖然我好鍾意出街食好西，但係一嚟味精多，二嚟又貴，其實自己煮都可以好好味，所以而家經常跟阿媽去買餸同偷師，學識煮嘢食唔係為咗想溝仔（不過可能都有用嘅XD），而係為咗自己，即係好似打機咁，男人又好女人又好，都應該喺各個範疇上面為自己升level，唔係為其他人，係為自己。
有時會見到朋友一對對好開心好sweet，但其實有好多單身朋友嘅生活一樣可以好多姿多彩，單身同拍拖不嬲都各有利弊，之前都享受咗咁耐拍拖嘅快樂，係時候要享受下單身嘅自由喇。記住呢個世界上，只有自己係永遠都唔會離棄自己，所以一定要好好愛自己呀！
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2019年1月20日
