【有咩慘得過】條女劈完酒,唔係被人送上房或送上的士,而係被人送去醫院…

 

(終極圖文不符)

 

酒精就係社交嘅潤滑劑,收工或放學,不甘寂寞咁去飲兩杯,識下新朋友,都係一件好事,好過抑鬱跳樓死。

身為老屎忽,我就唔會「咦~~咁污糟」咁去質疑呢種交際活動,反而我想多多鼓勵年輕朋友,趁後生,好好咁利用劈場去同唔同嘅人交流,交流乜都好啦。

既然係咁,今日我真係想同網友分享一個小故仔,係有位做急症嘅護士朋友同我講。

話說有位靚女護士朋友,邊度返工唔講啦,反正全港島都唔係好多公立醫院急症室近酒吧區,any 肥,佢有一晚night shift,有位妙齡女子,喺一位男性友人攙扶之下,唔係好清醒咁送左來。

夜晚嘅急症室,喺呢個被濫用嘅年代,返夜晚就係得閒少少咁多嘅,所以佢見到之後,都記得幾深刻。

個女仔咩樣就唔好講喇,總之好後生,一身酒味,又未至於昏迷嘅,但一定行唔到直線,自理不能,好明顯,即係中樞神經系統受到乙醇影響之下唔能夠好有效咁運作,俗稱飲醉酒,好醉嗰種。

「正常」來講,妙齡女子喺你面前飲醉酒,如果男伴係有風度嘅,好應該拿出手機,開酒店app,睇下附近有無房,一千幾百俾唔起咩而家?男士係好應該送佢上房,悉心咁照顧,直至天光,中間嗰幾個鐘,應該點呀?應該點做呀?唔洗叔叔教啦下話?梗係用暖毛巾幫佢抹面,訓覺要蓋好被,唔好凍親呀,酒精係會令血管舒張,散熱更快,凍親就唔好啦。

如果個男仔真係咁忙,一定唔係不解溫柔嘅,但無論點,出於善心,都好應該開「香港的士」,幫佢call 架的,送佢上路,返家嘅路。

但係我位護士朋友竟然見到,個醉酒小妹妹,係被人送左來醫院…

護士靚女朋友係專業嘅,既然送到入來,patient 又不能自理,所以都要按照程序,安排住院。既然要住院,即係要幫佢換衫啦,一打開件衫,年齡上做得姐姐嘅佢,話當時都不禁搖頭…

「阿女你做乜 _ 嘢要戴兩個bra 呀……」

呢個時候,靚女護士朋友終於明白,個小妹妹點解唔係被人送上酒店房。

我唔係想講乜嘢大道理,乜嘢兩個人之間最緊要心靈交流呀,乜嘢最緊要坦誠呀,乜嘢原本嘅你先係最靚呀,多餘嘅,落到劈場唔通講儒道墨法二十五史咩,個關鍵係,戴兩個bra 真係會衣不稱身,真係反映左阿女你唔識裝身唔識打扮,直接啲講真係太細路女,唔似出來行走江湖,正所謂修身齊家治國平天下,腦囟都未生埋嘅話,不如正正經經學下著衫先?

奉勸各位年輕人,修身以上,明明德之事也。

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 189448
Date: 2019-01-22 21:05:11
Generated at: 2020-02-25 08:21:12
Permalink: https://www.vjmedia.com.hk/articles/2019/01/22/189448/【有咩慘得過】條女劈完酒,唔係被人送上房或送