懷唔懷孕嘅嘢，梗係女人自己控制，而家二十一世紀架喇，去完巫山玩，唔通仲好似啲粵語長片咁，有左之後一哭二鬧三上吊要個男人負責任咩？所以好多女人都會食避孕藥，都唔好信啲男人。
所謂嘅避孕，理論係好簡單，就係阻止男性嘅精子同卵子結合，所以話最佳嘅避孕藥就係個樣，對某啲人來講係好殘酷嘅真相：唔做愛咪一定無BB。
而女性口服避孕藥，大致上係將女性排卵會產生嘅激素，直接從藥丸食落肚再吸收入人體，用藥物來呃個身體，以為自己排左卵，就唔會再排。無卵，咁就唔會有可能俾精子遇到卵，就唔會有BB 啦。呢幾十年嘅女性避孕藥都有變化，劑量劑型成份都有唔同左，但係個理論都係一樣。
一直以來，女性口服避孕藥都係以一個模擬28日嘅月經週期嘅方式去處方，即係一排嘅避孕藥，會有28粒，個包裝會顯示由邊粒開始食，沿住啲箭咀，一日一粒，食曬就一個週期。而當中有個好得意嘅位，就係28粒當中，得頭21粒係「有料到」，之後嘅7粒係所謂嘅「安慰劑」，即係得粒丸，係無藥力。喺缺乏外來激素嘅7日，就係模擬28日月經週期當中嘅「來M 嗰幾日」，呢位阿女就會月經來潮。亦都有產品係一排得21粒，食曬就自己skip 7日，理論同效果都無變，只係睇服用者係咪咁有紀律咁有記性而已。
而英國皇家婦產科學院，屬下嘅性與生殖健康學院，今年（2019年）一月中就更新左佢地嘅有關「複合激素避孕法」嘅指引（按連結會自動下載英文pdf），而口服避孕藥都包括喺入面。呢個行之有效嘅「skip 7日」俾女性身體M 到嘅做法，有好多研究證明左係完全無需要。呢個無需要，唔係口講下，而係醫生們科學家們做左好多研究，而啲研究就好複雜，我睇兩個sections 都係僅僅明，利申我無跟住啲註釋搵番啲paper 來睇。大致上就係，喺21日之後skip 7日呢個玩法之外，佢地安排啲女士，有啲食足九個星期，有啲長期食唔停，無論連續食幾耐，對個身體都無任何負面影響，包括各種身體機能，仲有女士可能好關心嘅，停藥之後會唔會可以懷孕，答案都係無影響；而研究更包括醫生與病人嘅交流，即係更新左處方，求診嘅人會唔會好反對，而醫生會唔會喺解釋嘅時候覺得好煩，呢兩樣都證實唔係，更有一個77年嘅調研報告，話八成嘅求診女士歡迎M 到少啲來。
更新左嘅指引，就建議醫生喺處方女性口服避孕藥嘅時候，除左好似而家咁，介紹「21日之後skip 7日」嘅用法之外，應該向求診女士講解其他選項，包括連續食三個月，連續不停食直至想懷孕等等。
對女士來講，無M 到往往意味住另一段人生嘅開始，而keep 住M 到亦即係keep 住心煩，更有啲會痛到返唔到工，正式係M 又煩唔M 又煩。
對男士來講，女伴M 到咪搵左右手解決下（其實唔M 到都可以搵佢地嘅），長期唔M 可以無限乜乜乜唔玩衝紅燈好似幾歡樂幾健康？
女士們又接唔接受呢種長期不停止咁服用避孕藥，令自己唔M 到嘅玩法呢？我唔係女人我唔知喇～不如女性讀者話下我知。
我去到2021年先唔再睇TVB——正向聯想 (Positive Association)
香港濕熱世界第一！？談散熱和濕度的關係
【職業安全】英國警花分享：防刺背心唔係咁著. . .
【遊戲評測】《血咒之城：暗夜儀式》新生惡魔城 四年等待完全值得
分手咪分手囉，三口六面講清楚好難咩？
薛定諤人生最尷尬的恥笑——薛定諤的貓實驗
2019年1月25日
