【為母之道】請中個黑面家傭仲慘過食屎,但通常事出必有因…

 

(示意圖:唔係我個B)

 

唔少父母為咗維持生計,即使小朋友出世後雙方仍然需要番工,迫於無奈需要聘請家傭姐姐去照顧BB。首先無得日夜見住小朋友已經好慘,若然請中一個又古惑又鐘意對住你黑面嘅姐姐,都咪話唔慘。所以於請家傭姐姐前,已經上網搜尋過好多其他人於聘請家傭時所面對嘅問題,再決定到底請菲藉定印藉好。

 

菲傭 VS 印傭

請菲傭,好多人都係貪佢英文較好,因為菲律賓曾經受過西班牙及美國殖民統治,令當地人可以接受高水平教育,而且佢哋思想較接近西化,衛生意識亦較好;但缺點係經驗與見識較多,對傭主服從性相對較低,喜愛用自己一套方式去照顧小朋友與處理家事,若然僱主指出問題,亦會比較易表露真性情(即係黑面);

印傭的話,由於大部分當地人士以務農為生,教育程度會相對較菲傭低,衛生意識亦較弱,但礙於較少海外工作經驗,所以一般對僱主所要求嘅工作細節較易服從,無乜太多個人主見,容易接受傭主指示。而普遍印傭都好願意學習廣東話與傭主溝通,若然屋企有老人家需要被照顧,呢個都係優點之一。

 

問清楚自己:聘請家傭嘅主要原因

於聘請家傭時,先問自己:「到底請一個家傭返來,目的係照顧BB,定做家頭細務?」有好多傭主覺得,我請個家傭返來就要使到盡,朝早6點起身,做家務、煮飯洗衫、湊BB直落至夜晚11點先可以休息。即係呢,其實你知唔知湊BB已經好辛苦啦,加上呢個世界無咗奴隸制度好耐~而家係請僱員,如果你老闆日日都chur到你咁盡,有返工無放工,相信應該無人頂得順掛?加上,生個BB出來就唔該盡番為人父母嘅責任,唔好乜都塞哂比個家傭做啦~我真係見過好多父母,情願出街一人揸住一部電話打機睇fb,都唔願意親手餵小朋友食一啖飯,乜都交哂比個家傭做。當然~請到個萬能人固然係好,若然唔得,要二選其一,你會點揀?

最後因為語言問題,為咗BB日後可以學習較正統嘅英文,亦希望佢可以透過同家傭溝通以增強英語能力,最後決定咗請菲傭,而聘請之前,再一次同自己認清聘請目的:「首要條件係照顧好BB,其餘都係次要~」

 

乜嘢相處方式唔重要 最重要於工作前講明工作需求與守則 

於請家傭前必定會先睇一睇相,選擇一個合眼緣嘅姐姐,但儘管幾合眼緣都好,始終都叫同一屋簷下,相處唔到真係幾啱眼緣都無用。我而家請嘅家傭係由一位由細照顧我到大嘅菲傭姐姐介紹,一見面時,佢比我嘅感覺充滿正能量,笑容滿面,經過兩次見面,終於達成協議簽約。由於係第一次聘請家傭協助,於之前都有想過:「始終都要共處一室,到底要以乜嘢方式對待佢,令到大家都相處舒服?」

開初選擇以朋友方式對待,希望佢可以盡快適應環境,用一個良好心態去照顧BB。後來發覺由於一開始就給予過高自由度,加上當時BB未出世,好多嘢都未知會發展成點,所以並無清楚講明工作範圍與要求,到日後要求家傭姐姐需要跟隨自己方式照顧BB時,因為家傭一時適應不了,傭主(即係我)要開始受佢面色。呢個係一個極大問題,最好於家傭未開始工作前,先列明工作清單,令佢知道自己主要嘅工作係咩,有所適從。講真,你老闆一時一樣咁,你都想黑佢面啦~

 

家傭都係一個有血有肉有感情嘅人 出現情緒問題必有原因

同一時間由於家傭覺得要離鄉別井兩年,情緒亦開始變得飄忽,容易於照顧初生BB時,因為諗起家中兒女而突然大喊,加埋黑面情況日益嚴重,呢個時候通常有好多人會選擇炒咗佢,另聘請一位更好嘅家傭以照顧BB。

但將心比己,自己要返工嘅媽媽,都應該明白返咗工後心掛掛想快啲返屋企見呀B嘅感覺,更何況係離鄉別井嘅家傭?試諗下,當身旁伴侶與仔女有情感需要時,作為妻子與母親不能作出即時安慰,給予擁抱,對佢哋來講係一件幾咁令人遺憾嘅事。當家傭出現情緒問題時,作為僱主嘗試盡量以冷靜心態跟其交談,多溝通交流,找出問題所在,再加以解決問題,好多時都係因為家傭突然思鄉病發作而令情緒出現問題。只要及時給予安慰,作出體諒,比家傭姐姐知道其實同樣作為母親嘅傭主明白佢難處,亦感受到離開親生骨肉到外地打工之痛,只要肯行出一步關心對方,相信會令佢對僱主家庭產生更大歸屬感。講真~佢做得開心時,對BB都好啲,自己都放心啲啦~

 

 

作者:SaSa 戀咁Share

SaSa 戀咁Share
現職某雜誌編輯 & 🐻媽媽🤱🏻 處女座完美主義者,趁仲尚在人世,用唯一小小嘅長處發掘更多世界美好一面👫 https://www.facebook.com/sasalovetoshare/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 189610
Date: 2019-01-26 18:08:54
Generated at: 2020-10-28 05:31:45
Permalink: https://www.vjmedia.com.hk/articles/2019/01/26/189610/【為母之道】請中個黑面家傭仲慘過食屎,但通常