（永遠警醒：做老鬼唔應該反檯，嚇親小朋友）
人去到中年，少不免都會檢討下自己嘅前半生。
大學係高等教育嘅場所，入得大學都係香港教育制度之下最叻嘅18%年輕人。憑住呢個身份，度過呢四年嘅大學生活，之後就要好似我地呢啲老屎忽咁，搵份工進入職場。
呢個flow，唔一定個個都要跟，好多人唔讀大學，學門手藝，都可以發展好出色嘅事業；同樣道理，讀左大學都唔一定搵到工，得罪講句，我就係人辦。
但有一樣嘢係必然嘅，就係無論點樣，每個人都要搵個方法，喺呢個社會入面生存。
咁同上唔上莊有咩關係？咁就要理解下其實上莊係乜先。
所謂上莊，其實即係做學生會或學生會附屬學會嘅幹事，幹事嘅職責，就係搵點事幹。呢個中心思想，任何大學入面嘅組織都一樣，上hea 莊無事幹，係最差的，浪費自己時間，浪費莊友時間，千其唔好。
唔同大學都有唔同嘅學生組織規條，大致就係，既有嘅學會，只要維持一定會員數量，就可以繼續營運，而任何一班人想搞個學會，只要夠人數亦可以成立一個新的；有了組織，呢班人就有憲制責任，選舉其中一啲人管理個學會，搞活動俾會員玩下咁，就係所謂嘅搵點事幹嘅幹事。
所以，在檯面上，無論點hea，上莊都一定學懂了一點點的憲政民主精神：會員有責任出席會員大會並投票，有志之士就參與選舉奪得公權力去管理個組織，服務會員。
又所以，過程中，在檯面上，上莊都會一定學懂了一點點待人接物乜乜柒柒，乜嘢團隊合作之類，你懂的，唔講太多。
但每每最多同學關心嘅，其實係比較切身嘅嘢：上莊有咩好處？
我先唔講呢啲是咪實際一定叫做好處，但講一啲一定會發生嘅嘢。
搞得學生組織，以組織名義去搵點事幹嘅過程中，幹事們係會識好多人，而呢啲識落嘅人，就係歸類為「相識於微時」嘅人：唔同小學同學，小學同學只會記得一齊玩一齊買零食一齊恰人或一齊被人恰，溫馨浪漫但無乜具體嘢嘅；唔同中學同學，中學同學一齊考試一齊初戀一齊破處（利申中學畢業嗰陣青頭），係一齊成長但又大唔透；而大學識落嘅平輩，真係再一齊成長到「社會人」呢個level。呢種相識於微時，係喺考驗中嘅相識，喺戰場上面大家一齊打過仗咁生存下來嗰種識。
搞學會嘅過程中，亦會識得好多長輩。學會名義搞活動，一定識到係大學入面嘅師長，包括埋你book 房要搵嘅學校職員，包括埋打掃嘅阿叔阿姐，當然包括教授、助理教授、教授助理…..嗯唔數了……仲有就係同你同一個學會，但早過你畢業嘅師兄師姐。呢啲人，都係相識於微時，係睇住你大（及睇住你壞）嘅人。
到出來社會之後，我就發覺，要識番上面所講，一係並肩作戰多年一齊生存下來嘅平輩，二係睇住我大嘅長輩，從而建立特殊又深厚感情嘅人，係非常咁難（難唔係無，利申咁我都有嘅），而往往無論順逆，最能夠互相扶持互相合作共事嘅，係呢啲有深厚關係嘅人，而唔係嘻嘻哈哈嘅所謂識得嘅人。
以上所講，客觀來講我只係講好難，咁呢個係好定唔好，其實因人而異，非常主觀。
喺我嘅主觀角度，就係非常咁好，至少係令我死唔去嘅關鍵。
我在學嗰陣搞國事學會，認識嘅某幾位師兄，唔開名啦，識我就可以問我。喺我當初有成立「輔仁媒體」諗法嘅時候，做某大銀行管理層，時薪唔知幾多嘅某位叔叔，用左一晚，紓尊降貴陪我坐麥當勞傾計，佢問我一個問題：「阿Rocky 你諗住壇嘢個cash flow 係點？」而我係要多謝佢一世，無左呢句問題，我可能已經餓死左；而另一位師兄，我搞得網站涉足好多嘢，佢係某上市公司管理層，又係時薪唔知幾多，係會約我飲茶傾下社會大事，審時度勢咁；當然仲有直頭同我一齊成立輔仁媒體嘅股東，都係搞學會識落嘅師兄，唔吹噓佢了，怕佢打我。
如果我唔係由細被佢地睇住我點變大變壞，我唔知有無可能，喺嗰個時空，以嗰個身份，向呢個水平嘅社會賢達討教？畢竟世事係無如果，我真係唔知，可能有第二啲人掛？我只係知道，呢幾個肯幫我幫到不問回報嘅人，係我細細個就識落。
然而我相信，下一個課題就係，上乜嘢莊先會識到社會賢達？
但我又覺得，唔同人對於社會賢達嘅定義都唔同，好應該由年輕人自己發掘。
我只係希望，讀大學得閒嘅話，就諗吓上莊，齋參與活動學到嘅嘢識到嘅人，個關係係完全唔同層次，講緊係戰友同埋點頭之交兩個層次，呢樣嘢係不可逆轉，因為每個人只有一次十九歲。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2019年1月26日
