【嗚巴軼事】條女呢頭call 車，嗰頭上左架的士走左，做司機嘅可以點？

呢晚，筆者係廣福道響左枝旗（柯打），去大埔滘黃宜坳道接客個客叫Z小姐（個app係咁顯示，名都慳返唔洗化）。去上車點三分鐘都唔洗，筆者諗住開開心心去接客。

去到上車地點，等客就例行公事。香港人覺得俾左錢要你瀨鞋底都好應份，作為一個專業司機，當然係停好架車乖乖等客。過左三分鐘之後（三分鐘後開始收等候費），出於好心（實質催客），筆者打俾Z小姐。

筆者（筆）：「你好，架車已經到左。」

Z小姐（Z）：「其實我想取消架，不過呢我唔識撳，我又打唔到俾你，你可唔可以幫我取消。」

筆者心諗，今次出事了。

筆：「咁請問你係咪上左的士？」

Z：「係呀。但係我又取消唔到，又打唔到俾你。」

筆：「我打到俾你喎⋯⋯咁你有冇update 吓個app呀？」（啲人成日唔update app就叫車，雖然都叫到車，但可能有啲新功能會用唔到）

Z：「我今朝先用過咋。」（條女九唔搭八）

筆：「我就奇怪點解到左唔見人呢？」

Z：「係呀，見到有的士咪照上囉。」

呀！DLLM！筆者呢吓真係一嘢撻著左。

筆者：「阿小姐，你知唔知我上黎接你都要時間㗎？如果你真係趕時間嘅，你唔好叫車啦！你直接坐的士啦！」（筆者真係唔介意過啲生意俾的士佬，反正西客度度有，錢又搵唔哂）

Z：（好似剛剛瞓醒咁）「唔好意思呀⋯⋯」（講完呢句唔好意思，直頭殺左人都唔洗坐監）

筆：「而家通知埋你，我到左上車地點而且等左一段時間，所以會收返你取消費。」

事情去到呢度。今時今日，點解香港人去日本想book間餐廳都會被拒諸門外？最根本原因，一開始怕蝕底，有理冇理霸住啲嘢先（無論位定係車），到時有其他offer就粒聲唔到放人飛機。自己時間就係時間，人哋要準備要接你就唔L係時間。呢啲自私撚自己爽完就算，個遊戲俾呢班人玩爛哂，後來嘅人就俾呢班人搞到想玩/食/搭車都困難重重，或者諸多留難。

或者學健吾話齋，我呢啲聲音微小，講左未必有人聽得入耳。不過俾人留難或者「開波吊高」個陣，就唔好問點解啦⋯⋯

作者：車上人間

一個男人一架車，見盡香港人和事。

閱讀後覺得好，請多多讚好及分享～：）