歲晚清狗半價起？寵物買賣何時了

每個人都有唔同的價值觀，
所以我好少用道德去批判人，
只會以利益去考慮係咪值得結交。
但我今日想開一個地圖炮：

「買賣寵物的，無個係好人。」

先唔講咩生命無價之類的哲學野，
香港明明有萬幾隻貓狗等人領養，
每年有四千隻要人道毀滅，
仲有人出錢買，
好明顯唔係出於愛心，
而係出於自私好奇軟弱控制欲等等原因。
缺點人人都有，但我特別憎人虛偽，
因為怕俾人背後插一刀。
果種「養得起你就係大爺」的聖母嘴臉，
一見就想嘔。

其實好多寵物店都勁無良，
完全唔會當貓狗係一條生命，
夾硬逼貓狗配來配去，
甚至食藥夾硬配，
為的可能就係果一千幾百蚊。
純種狗，其實唔少即係近親繁殖，
誇張起來可能只係來自幾十隻的基因，
比混種狗易有遺傳缺憾，
有部份只有觀賞作用，
本來就唔應該來到依個世界受苦。

賣唔出的，
好少少就放生，
衰少少就焗死毒死，
每一個買貓買狗的人，
手下都有無數冤魂。

或者有人會講，
領養的貓狗會有唔少的毛病，
可能又要人陪又要睇醫生，
唔係人人養得起。

CLS，又忙又窮就咪養寵物啦，
去太子買盆花種種咪幾好，
一定唔會抓爛你梳化，
又唔會俾我鬧。

其實貓狗同人一樣，
都需要活動空間的，
就好似住籠屋易抑鬱咁，
香港本來連人都不宜居住啦，
何況係貓狗？

寵物店其實就係吼準港人愛心泛濫，
同拐帶兒童打跛手腳行乞無咩分別。
愛係唔足夠的，
問題係你有幾愛，
願意為愛思考。

你真係有愛心又唔夠能力，
去做做義工陪貓狗咪夠。
當貓狗係工具或玩具的人，
就乖乖地認左佢啦。

寫完，冷靜少少諗，其實我嬲的又何止係寵物店同買家？
上樓無期，醫療崩盤，不也是源頭減廢做得差嗎？

作者：周怡

閱讀後覺得好，請多多讚好及分享～：）