【塔羅個案】農曆新年另一半如果唔帶你返屋企拜年，其實唔一定有咩特別意思

就黎過年，好多拍緊拖嘅朋友都會有少少在意，「到底另一半會唔會帶我返屋企拜年呢？」咁始終，帶另一半返屋企，有時仲要係團拜，初一初二就一口氣見哂對方一堆親戚，能夠喺呢個場合，被介紹為「呢個係我男朋友／女朋友」，對於唔少朋友黎講，都會係一種身分嘅肯定。

咁但係如果對方提都無提，又可以點呢？自己開口問「吓你唔帶我返屋企識你屋企人架？」又好似有少少唔知點咁。

我遇過唔少客人，農曆年之前都會出現類似嘅心理糾結，理智嘅會覺得「咁我地拍得又唔係耐」或者「可能對方決定結婚先帶我返去呢」咁樣黎安撫自己。

但係，亦都有部份比較容易亂諗緊張嘅朋友，發現另一半過年係唔打算帶自己返去拜年，個心就會好不安，甚至諗到「其實佢係咪唔係對我認真？」，或者部份關係唔算好穩固嘅，就再諗極端少少，例如「佢會唔會有正印另一半所以唔可以比我見光？」之類嘅疑問。

其實，對方帶唔帶你返去拜年，真係唔一定有特別含意。有啲人屋企人多勢雜，三姑六婆多，唔想自己嘅私人事比啲一年見一次嘅表姨婆說三道四，為左省卻麻煩先至唔出聲；亦有啲人本身唔係同屋企關係咁好，新年比面老人家先去拜年，與其帶埋另一半黎受苦受難坐全日，倒不如各自為政一兩日算罷啦。

近期我聽過最實際嘅例子，係一位男性客人，屋企人慣左年三十晚就開枱打麻將，可以車輪轉咁換人打，打到初二；而佢女朋友係基督教徒，唔賭錢又唔識打牌，所以佢先決定唔帶女朋友返去，唔想女朋友傻更更咁聽住一班老人家「喂我頂你截我糊！」浪費時間，一個唔覺意班老人家仲會厚面皮叫女朋友煎糕沖茶切生果……因為唔想女朋友做牛做馬又悶，咪叫女朋友自己休息下。

唔帶你返屋企，原因唔一定係負面的。如果「帶唔帶你返去」對於你黎講係等同「佢係咪對我認真」，又咁講，如果你個心對呢段關係存在「佢是咪對我認真」呢個想法，即係話不安感一早已在，帶唔帶你返去拜年並唔係一個令你動搖嘅主因。

呢個時候，倒不如問下自己，其實令你對關係無信心嘅原因係黎自啲乜野。

拍左好耐，都無參與過對方家庭活動？唔知到底對方係咪想同自己認真（普遍定義為結婚）？其實與其自己估估下，估完自己又唔開心，不如直接開口問對方。

如果對方係對你認真嘅，無理由咩都唔肯講先係。我是這樣認為的。

【塔羅牌個案分享】

作者：神婆

非典型占卜師，唔神秘，無形象，除了鐘意聽客人講故事，夜間興趣係打機睇動漫同撚貓。https://www.facebook.com/FortunaMessage

閱讀後覺得好，請多多讚好及分享～：）