【港大蒼傲落選】反對派嘅階段性勝利真係好幼稚

政治 / 最新文章綜覽

 

【點票即時】根據選委會於二零一九年二月二日上午八時數據,結果如下:會員總人數:16896[以下內容均以以下形式列出:(贊成票)//(反對票)//(棄權票)]中央幹事會 總票數:5572 總投票率:32.98% 有效票數:…

Campus TV, HKUSU 香港大學學生會校園電視發佈於 2019年2月1日星期五

 

大學生係未來社會棟樑(大約係),學生會係未來社會棟樑中嘅中流砥柱(應該係),無論建制派定係反對派,以前都好鍾意扶植或拉攏學生會整個內閣或個別會長及成員,不同政治勢力為左尋求新血及擴大影響力,染指大專學生領袖,係好正常不過嘅事,睇闊少少,就算係商界都會入大學做recuitment talk,有咩所謂。只要將呢個現象視為正常,然後去分析個形勢,先係有意義,否則就會淪落到好似反對派咁,佢地自己入港大聲討徐立之就得,人地send 多兩個微信拉票就唔得咁荒謬。

我不只一次強調,而家香港嘅政治大勢唔同以前,以前香港係中西政治,而更主要係中美中英政治經濟角力嘅戰場,佔據到香港政治話事權,係有好實際嘅經濟利益,出口轉口金融地產基建,邊個能夠利用政治影響力,然後做到生意的話,係有錢分的。而反過來睇,可以動搖到個管治,至少令當權者覺得你係烏蠅,都可以令佢多一事不如少一事,俾少少甜頭你。呢啲就係上世紀所謂殖民地行政主導,但仲有吸納華人精英,六七暴動後仲會大搞社會福利嘅政治背景。而當然,吸納精英其中一個渠道就係大學生。

回歸前無論建制(即係英國殖民統治者)定係中共都有「搞」班大學生,英殖建制要做嘅嘢好簡單,開公務員位就得,只要你乖乖地,屋仔車仔老婆仔BB仔一定有你份,如果你無份只係因為你失敗唔係因為個殖民地制度桎梏你嘅發展。喺香港未當權嘅中共就要俾多啲心思,例如透過中聯辦前身嘅新華社,幫大學生搞名為交流好似旅遊實質統戰,感受祖國河山莊麗民風淳樸敦厚領導高瞻遠矚,唔係咁,你估當年民主回歸派係點來架?馬後炮咁講,中共嘅戰略梗係大勝利過沖田小姐(對唔住我真係好偽毒)。

回歸後,中共係建制,從前嘅英美政治買辦,食過下英殖餅碎養大嘅,就係而家嘅反對派。

 

講咁多做咩?就係跟住要講一樣野:喺局外搞香港「政治」,而家係無油水。

而家香港政治嘅主戰場,都係服從中共領導下,都係「人民內部矛盾」,即係建制派與建制派互打,睇下曾蔭權呀郭炳湘呀嗰啲?呢啲先係入肉,因為呢啲先有利益,邊幅地俾邊個「發展」,呢啲先係錢。呢啲嘢,而家嘅香港反對派,俗啲講句,連波皮都掂唔到,丫唔係,民主黨公民黨都仲可能有啲專業人士,適當時候佢地會做比建制派更契弟。至於啲乜嘢工黨,就真係坐山觀虎鬥啲朋友。本土派(如有)呢?都係處於休養生息,idea is bulletproof 咁,得閒like 下台獨份子嘅fb post 咪當連結左囉。

咁同學生會有咩關係?你睇我講左咁耐,有無提過下大學生?

個大格局就係咁,仲有一樣野叫做世代之爭,無論咩派別都好,唔同以前經濟起飛處處商機丫,啲老人家啲三四五十歲大人都未死,真係值得吸納大學生咩?真係需要扶植大學生咩?真係需要喺大學社群「做工作」咩?吸納到扶植到梗係無所謂,但係仲值得好似以前咁,擺咁多人力物力心力財力落去咩?

 

蒼傲參選港大學生會,佢地贏都仲話有啲笑位,而家不信任埋,真係完全無值得討論嘅價值。

第一,今次係無兩班人撼莊架,即係同學得三個選擇,信任、不信任、棄權(包括真係唔投或者投棄權票投廢票),反對派話佢地親共,本土派(如有)話佢地on9,但係個結果,一係佢地當選,一係佢地落選,落選代表乜?唔會連影印都無嘅,學生會有staff 返工,其他屬會一定有得book 房搞活動嘅。係囉,講講下,其實無咩特別嚴重後果。

第二,建制派要搞港大學生,一定要搞你學生會咩?呢個搞,泛指拉攏扶植啦,其他學會,特別係我以前上過莊嘅國事學會,佢地近年大把成員爭相想親近建制,林鄭選緊嗰陣去打卡集郵扮有份又有,唔出聲係咁參加菁英會又有,都未計我地嘅優良傳統年年都搵中聯辦食飯R 贊助感受祖國山川壯麗領導偉大。學生會出缺呀?對唔住人地真係「唔會俾你一個屌」,學生會無統戰價值,咪統戰其他人。

第三,反對派呢一仗係無任何實質收穫,in terms of 人才組織錢乜乜七七都無。題目話階段性勝利真係俾多你,根本唔知反對派開心啲乜嘢。阻止到個樣衰嘅小惡魔當選呀?搞政治仲低能過年頭嗰陣啲樂壇頒獎典禮。

第四,根本連建制派都覺得佢地on9。但唔通講出聲咩,咪得番啲乜嘢港人講地同你玩。當然啦,選完喇,選唔到呀,班細路都係有人生嘅,之後條路點行邊個知,可能人地好做得野呢,睇下嗰個乜撚野王耀瑩?

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

  • 點先可以令男人唔好偷食? by 木頭
    衰啲咁講,你地由細到大所有來自電影、劇集、小說入面果種忠貞好男人,好似耶穌、真神同觀音一樣——係,冇人可以證明佢地唔存在,但同時亦都冇人可以大大聲聲話佢地親眼見過。就算你有姊妹同你講佢見過,甚至親身擁有過,都只不過係源於佢地唔了解佢地身邊嘅…
  • 【遊戲新聞】最強多人喪屍遊戲 《Left 4 Dead 2》相隔十年推出最後大改版 by 五木
    經典遊戲《Left 4 Dead 2》推出超過十年,話佢係最強多人喪屍遊戲應該都無乜異議(雖然我覺得一代正啲) […]…
  • 我幾點收工關你叉事咩! by 小盛女
    「你呢排係咪好得閒?我見你成日都好早收工,琴日六點幾已經唔見你。」人事部Macy說。「我放六點,六點半我先走㗎喎,而且準時收工都正常啫。」我說。「無,想睇下你係咪好得閒咋嘛,以前你成日都好夜收。」Macy說。…
  • 我才不要做那種抱着男人雙腿苦苦哀求的女人 by BEAR 兒
    「只要我說了,我就是輸家。我才不要做那種抱着男人雙腿苦苦哀求的女人。如果不想受傷,你就得先去傷害別人。這道理我年青的時候就學會了。」她穿着一條白色的連身紗裙,披肩的黑髮和鮮艷的紅唇使她散發着成熟女人的魅力。這番話出自她的口中,非但不突兀,反…
  • 所謂「唔想拍拖」,完整意思通常都是「我唔想同你拍拖」 by 月輪
    在情場上無數次暗戀的失敗經驗告訴我,聽到「唔想拍拖」這句話,其實比聽到「我唔鍾意你」更令人上火。直接了當地說彼此不適合,沒有感覺,至少是一槍斃命的痛快,但若說「唔想拍拖」,卻令對方有種要苦候的感覺。因為對方可能會怕若不等待,突然你想拍拖時,…
  • 「玩玩就好!」 by 麻甩水瓶
    這是你在第一次吻了我後說的第一句,當然,沒有人會認真玩火。那一刻你看我的眼神,好像全世界只有我一個人能被你這樣看著,好記得那雙有魅力的眼睛。好記得那淡淡的薄荷煙草味,好記得你早上的問候,而晚上待我洗澡後才睡的關心,好記得你提醒我飲酒前要吃點…
歡迎讚好我們的facebook page,免費資訊源源送上。

文章資訊

ID: 189829
Date: 2019-02-02 18:55:05
Generated at: 2020-09-25 14:59:37
Permalink: https://www.vjmedia.com.hk/articles/2019/02/02/189829/【港大蒼傲落選】反對派嘅階段性勝利真係好幼稚