比起日本,喺香港食咩都同食屎冇分別

 

我知,依句說話好廢,但我都想講吓個分別大成點。

你問我日本有冇邊間嘢真係覺得唔好食?我只可以話十六日以嚟只係有兩三餐覺得唔係咁好食,而當中只有一兩樣食物係真心覺得差。我點樣去定義唔係咁好食呢?就係我食咗一兩啖之後會講句「香港貨色」。你可以話因為我上得網自己搵心水餐廳,睇過哂食評先揀自然差極有限,但弊就弊在有好多只係我地行經覺得啱就去食嘅依然唔錯,而且香港餐廳上網有人推介嘅十間入面咪一樣有八間伏。依個就係日本同香港餐廳最大嘅分別——日本出名好食就真係好食,香港出名好食嘅我都唔知好食喺邊。

就好似我影嘅依嚿嘢(調咗色搞到啲海膽咁樣衰,我錯),三文魚籽同海膽多到嚇死人,下面係二開六嘅壽司卷,仲要講新鮮同味道都冇得輸。喺香港食嚿冇乜海膽嘅海膽壽司都收你二三十蚊嗰陣,我依堆嘢只係講緊一百蚊左右,當佢拎過嚟嗰陣我真係差啲想嘩一聲出嚟。兩個人唔理價錢咁叫,又依嚿嘢又中拖又炒海鮮又壽司,埋單每個都係二百蚊多啲,喺香港食放題啲冇味急凍嘢仲要收多我一百,而家諗返起都覺得折墮。

 

 

之後去咗一間專食炸豬扒飯嘅名店,仲諗住好多香港人啦,點知去到又聽唔到人大大聲講廣東話。見到成間鋪頭坐滿哂日本人,我都知自己冇揀錯地方,不過點估都估唔到原來炸豬扒可以好食到依個地步。一百蚊嘅價錢,食到大大塊又嫩又多汁又有豬味得嚟唔會騷嘅炸豬扒,應該係我人生中第一次覺得一百蚊嘅炸豬扒飯可以用個抵字嚟形容。我諗香港要食返依個水準嘅炸豬扒飯唔係唔得,不過可能收你三百蚊一個飯,然後再加一、茶錢、花生錢,總知就唔係我依啲平凡人去嘅餐廳啦。

成個日本旅行,我食過嘅餐廳大概都係「比香港平一截又好食過香港」同埋「睇落唔係平但食落就知係抵到爛」依兩種,香川嘅骨付鳥就係最好例子,不枉我地夜媽媽凍冰冰冒住微雨企喺街排佢半個鐘。而家返到嚟香港,我對出街食飯嘅興趣真係唔算大,因為同日本一樣嘅價錢可以比日本低好幾倍嘅質素,除咗噚晚食嗰串炸大腸,我暫時搵唔到一間我覺得個價係抵比嘅餐廳。

又係嘅,香港租咁貴,又有咩可能搵到吖。

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 189849
Date: 2019-02-03 04:26:25
Generated at: 2021-12-05 15:24:51
Permalink: https://www.vjmedia.com.hk/articles/2019/02/03/189849/比起日本,喺香港食咩都同食屎冇分別