香港政界真垃圾——飯民年宵與林鄭派柑

政治 / 最新文章綜覽

 

 

利用節慶去表達對大眾嘅關懷,係世界各地政客都會做嘅,但唔知點解,香港真係做得好核突。

 

陳茂波係勇敢嘅,香港人好簡單,關於錢嘅就入你財政司司長數,你派錢派到咁,就算唔噓你,我都心入面諗,我來馬場發財,撞著呢個瘟神,真係慘過被人搭膊頭。

不過而家特區官員我諗其實都秉承特首路線,視民望如浮雲,的確民望除非低到一個位,係連成個香港各個sector 都憎到入骨,否則個安全系數其實好高。

馬場啲人咁大反應,都係噓下,畢竟四千只係橫財,未至於要丟番茄嘅。

唔想被人噓其實有身分證就派四千囉,但係佢點解要迴避被人噓?無恥就無敵,呢個唔係鬧佢,而係讚佢已經立於不敗之地,你反對派除左不痛不癢咁笑佢被人噓,其實做唔到啲乜。

 

林鄭年初一朝早去維園派柑俾清潔人員,一睇就知佢知行合一,視民望如浮雲係入曬骨髓,啲阿姐阿哥仲戴緊勞工手襪,倒緊垃圾,佢就埋去笑口噬噬咁,一人一個柑,啲阿姐阿哥收到,真係好尷尬,第一時間唔知袋邊好,自己隻手又唔係乾淨,唔通即場搣順便撈垃圾汁食?

其實我都理解嘅,要俾鏡頭影到佢派,假期流流又無咁多人陪你做大龍鳳,又唔捨得買多啲一人一大pack 唔同生果咁拿走,咪唯有鏡頭set 好曬之後林太喺度逐個柑派,真係寒酸。

銅鑼灣啲好大間嘅超級市場,啲日本柑都係幾十蚊一袋仔,清潔工一人一袋仔洗你幾多錢?名正言順claim 公數都無人鬧你啦,啲工人又方便拿走,又甜啲食得歡樂啲,唔知啦,而家係核突,咁又點,反對派做到乜?

 

反觀反對派,如果佢地唔係離地,就一定係代表香港真係好太平。

一啲以乜嘢自決,乜嘢阻止赤化為招徠嘅政黨政團(無曬議席算唔算政黨?是但啦),佢地會設計一啲印有權貴唔鍾意嘅信息嘅產品,然後乞求大陸嘅工廠幫佢地生產,人地唔接呢單,佢地就呼天搶地好似李香琴無電視睇咁,做咩姐?其實二十幾歲一啲都唔細,以為咁樣係凸顯權貴制度嘅不堪咩?其實呢樣嘢係well known 架喇,睇下沙中線?一個佢地口中咁嘅鬼國,你仲埋去想落單造嘢?而家係你話俾人知你幾做唔到野。

仲有公民黨呢啲以專業人士為賣點嘅政黨,佢地真係覺得反對派嘅支持者就係長假期會搭飛機旅行,所以設計埋曬啲豬樣頸枕咁?

 

講完,返去打機。

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 189983
Date: 2019-02-07 19:39:30
Generated at: 2020-02-25 09:11:39
Permalink: https://www.vjmedia.com.hk/articles/2019/02/07/189983/香港政界真垃圾-飯民年宵與林鄭派柑