成份人工幾乎畀晒家用嘅人,先係最不孝!

 

聞言,有人年近而立,但係銀行戶口仲會畀阿媽睇實,阿媽仲要佢交出網上銀行帳戶密碼,待佢可以隨時登入睇佢收入,再釐定家用數字,如果反對,必然會畀阿媽冠以不孝之名云云。講完事例,就不免批判下中國儒家傳統孝道,然後又搬出名人講咩「孝順」過咗時,佢同仔女講「愛」就得。

其實,喺儒家嘅角度,呢個事例嘅事主,任得佢阿媽咁樣對佢,甚至任得阿媽以孝為名控制佢,本身就係相當不孝;至於名人話佢講「愛」唔講「孝」,仲話「孝順」過咗時,其實佢講嘅「愛」就係「孝」之嘛。

首先,點解事主係不孝呢?首先嚟睇下一個類似嘅事例:

曾子耘瓜,誤斬其根。曾皙怒建大杖以擊其背,曾子仆地而不知人,久之有頃,乃蘇,欣然而起,進於曾皙曰:「嚮也參得罪於大人,大人用力教,參得無疾乎。」退而就房,援琴而歌,欲令曾皙而聞之,知其體康也。孔子聞之而怒,告門弟子曰:「參來勿內。」曾參自以為無罪,使人請於孔子。子曰:「汝不聞乎:昔瞽䏂有子曰舜,舜之事瞽䏂,欲使之未嘗不在於側,索而殺之,未嘗可得,小棰則待過,大杖則逃走,故瞽䏂不犯不父之罪,而舜不失烝烝之孝,今參事父委身以待暴怒,殪而不避,既身死而陷父於不義,其不孝孰大焉?汝非天子之民也,殺天子之民,其罪奚若?」曾參聞之曰:「參罪大矣。」遂造孔子而謝過。[1]

為方便平時鬧開儒家但又唔識睇文言文嘅人,我將故事簡述一下:曾參有日種瓜,唔小心斬咗條瓜根,佢阿爸曾皙嬲起上嚟一棍打暈咗佢。後來曾參醒返,反而走去同老竇話自己做錯咗,阿爸教我啫,佢冇事,而然仲走去彈琴唱歌,想令曾皙知道自己冇事。孔子知道之後直接話唔見曾參。後嚟孔子解釋,主張自己孝順,咩都聽阿爸話(即今日所謂愚孝),聽話到任得阿爸家暴,分分鐘仲會畀佢打死,令父母犯罪,呢啲先係不孝。重點就喺呢度:

「愚孝係不孝」<-麻煩編輯大字置中

儒家處理人與人之間嘅關係,當中係相當強調個人責任呢個問題。經常畀人批鬥嘅「正名」,即係「君君、臣臣、父父、子子」[2],成日有人將佢講成臣子一定要服從君父,係儒家講階級,儒家要人「安份守己唔好反抗」嘅其中一個表現。但係,其實儒家呢度所要求嘅「安份守己」,唔止係要求緊臣子要「安份守己」,仲要求君父都要做好自己嘅責任。至於君父要點樣去盡自己嘅責任,連同另外三種「在上位者」又可以總結成「父慈、子孝、兄良、弟弟、夫義、婦聽、長惠、幼順、君仁、臣忠,十者,謂之人義」[3]。處於「在上位者」嘅父兄夫長君其實係有佢哋自己要做嘅事。

返嚟睇返上面曾皙打仔嘅故事,當中就有一句「故瞽䏂不犯不父之罪」,不父亦係罪嚟,具體就係話「為父不慈」呢種惡行。瞽䏂為父向來不慈,殺子更係不慈之極,所以作為孝子嘅舜,最多畀佢打幾下,一察覺到父親要殺子佢就一定走咗去。所以話,儒家首先認為,唔係射咗督精做人老竇就可以對仔女為所欲為,十月懷胎亦唔代表仔女以致佢哋嘅人生係老母嘅私有物。至於後嚟嘅「三綱」[4]──要求下位者無條件聽話──就係日後法家者言將人倫關係變成法條,再混入儒學嘅結果,已經冇咗一開始儒門嘅溫情。

講到呢度,今日脫離宗族社會嘅華人日日無病呻吟緊話自己唔識面對父母親戚,甚至係職場上面對上對下對內對外唔識點處理,其實儒家傳統上所講緊人倫關係原則已經畀晒答案。偏偏人人都話自己每日面對緊嘅人倫問題係儒家玩佢哋。

講返一開始畀阿媽監視財政嘅事主。雖然其母並冇用刀仔插佢,但喺現代商業社會,一個人將近而立而冇財政獨立,而且父母以「家用」為名好似寄生蟲咁吸食子女喺社會上收獲嘅大部分成果,令仔女人生無望,係無異於殺子。父母殺子,都仲就條頸埋去畀佢劏本身就係陷父母於不義,是為不孝。雖則要求家用冇犯法,但令父母永遠喺網上畀人評頭品足(老實講咁搞法,身邊知情者都會對佢評頭品足啦),又係陷父母於不義,又係不孝。反抗應該反抗嘅要求,本身就係保護父母名聲,先至係孝道;至於去到強行索要事主個人資料係唔係犯法,我就想留畀法律專家講喇。

至於點解大手畀家用以前唔會有人話有問題,係因為以前華人社會係宗族社會,好人好姐都係聚族而居,大手畀家用唔止係畀屋企,仲係畀緊全個宗族,宗族可以代族人一筆過去官府納稅、興修水利、請教書先生去祠堂開課、過時過節仲有豬肉分;遠比今日畀錢老竇老母然後有一床一席三餐飯多好多嘢。今日我哋──至少講緊喺大城市生活緊嘅人已經完全唔係喺宗族庇蔭下生活,大家都係喺核心家族生活;畀家用並唔係支持緊宗族興旺,而係聊表孝心啫。聊表孝心表到自己窮,咪又係陷父母於不義囉。我哋嘅父母輩啱啱好就係生活喺宗族社會瓦解緊嘅年代(呢度要講句感謝國家感謝黨),一時轉唔切有幾奇?但去迎合就真係傻夾笨,唔去指正就真係特等不孝喇。另外,孔子亦明確咁講過:「唔係帶住敬意去供養父母,同養狗冇咩分別架咋。」[5]畀家用畀到條氣唔順,應該都冇幾多分敬意架啦,咁即係養緊狗啦。

睇到呢度,其實「孝順」有冇過時呢?係咪講句「愛」就足以取代「孝順」呢?孝順父母本身就係愛──父母以愛待子女、子女以愛報父母,只不過係古人唔興用個愛字,而且當年儒家比西人細緻少少,講多咗啲「點樣愛」:「父慈子孝」難道就唔係愛咩?不過具體要點愛,就看倌閣下自理嘢,只不過收入幾乎畀晒家用嘅人,就肯定係最不孝嗰個。

 

[1]出自《孔子家語·卷四》。《家語》故事唔一定係真,但反映一個時期儒家對孝道嘅睇法。
[2]出自《論語·顏淵》,齊景公問政。
[3]出自《禮記·禮運》。《禮記》係孔子及其門人對《禮經》(《儀禮》)嘅解釋文章集,所以對禮嘅意涵有詳細嘅說明同衍論。
[4]君為臣綱、父為子綱、夫為婦綱原出於《白虎通義》,可以話的確又真係一群儒生傾出嚟,但最早係嚟自《韓非子》。由《韓非子》到漢章帝召大儒嚟白虎觀開大會之間幾百年,本身就係儒家同各家派不斷混同嘅年代,當時儒學亦以較接近法家者言嘅荀子一派為主流,同日後以孟子一派為主流好唔同。
[5]原句:「今之孝者,是謂能養。至於犬馬,皆能有養;不敬,何以別乎?」出自《論語·為政》。

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

  • 【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著 by 滅盡殺手
    早兩日我哋嘅一篇小知識技巧篇入面有提到要盡快解鎖收集道具必備嘅潛水艇,雖然做村任好快就會有第一隻潛水艇,但係要 […]…
  • 《星際啟示錄》全面大解構 by 湯子霈
    (以下內容全面劇透,及粗淺解釋科學理論)《星際啟示錄》(Interstellar)故事簡單,講述人類在地球面臨末日,美國太空總署探索新星球進行太空移民,延續人類文明。不過,全片涉及大量科學及物理常識,即使是理科生也未必完全明白;同時,劇情探…
  • 【Reg Day 攻略】大學新生註冊四件事 by Cube
    不要以為,Reg Day只是單純報到,拿張學生證就完事。這一天是十分重要的,不想留下不愉快的回憶,就要好好準備了。…
  • 港大舍堂次文化雜談(上):迎新與仙制 by 殷琦
    迎新是Hall的大事。…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 其實點先算係鍾意一個人? by 小盛女
    其實我都唔係好清楚(嗱唔好打我),不過以下有幾點可以畀大家參考吓。首先,你會乜都想同佢講,就算係啲無聊低能嘢,當你工作上好大壓力或者遇到唔開心嘅事,你都會同想同佢講,因為你知道佢會靜靜哋聽你呻,雖然唔一定會幫你解決到個問題,但係女人要嘅從來…
歡迎讚好我們的facebook page,免費資訊源源送上。

文章資訊

ID: 190050
Date: 2019-02-08 05:32:52
Generated at: 2022-08-11 20:03:00
Permalink: https://www.vjmedia.com.hk/articles/2019/02/08/190050/成份人工幾乎畀晒家用嘅人,先係最不孝!