飲茶是人權

 

新正頭,一向做乖乖仔的我,梗係早些起身去拎位飲茶,殊不知見到班知客木口木面,無理由過年都咁嘅樣,所以我走埋去逗下班靚女知客,睇下我幫唔幫到佢解困,好歹我都係一個樂於助人嘅新青年。

我:做咩咁樣衰到咁呀?
知:鬼咩,做到無停手呀,老闆之前話人太多、爆棚嘅時候,會有特別獎金俾我哋,點知佢加左枱,大家住迫啲,咁佢搬左龍門,就話自己冇爆囉,咁咪冇獎金囉。
我:咁佢多左枱,唔係按比例增加人手咩?
知:發夢啦你Ben哥,我地唯有跑多步,之前請咗個批兼職樓面,連單都唔識落,又入唔到系統出單,我做知客都要幫手落單呀!
我:咁老闆都應該比番多少誠意你地,等你地開心番啲吖!
知:佢請咗商場隻北獅嚟夢咗幾吓,又將夜晚食剩個啲壽桃請我哋食囉,不過要憑飛換囉,講真,平時仲食唔夠咩!
我:你大老闆都幾PK喎!
知:佢唔係PK,佢係PY!
我:佢叫柏賢吖嘛,咪叫PY囉! Ben哥哥,有位啦,入去坐啦!

開好茶,叫好點心嘆吓報紙之際,聽到出面人聲沸騰,有群人大叫「飲茶是人權」「我係中國人就可以飲茶」,群眾聲音此起彼落,我聽到有人在發表偉論,話「茶客咁多係因為老人家過多」、「新移民唔係迫爆茶樓嘅主因」,我本能反應在坐位呼嚕「去飲茶返大灣區飲啦、再唔去跟肥媽食魚生啦!」我天真的以為在我身邊,總有人會和應我,殊不知大家只顧吃著茶樓提供的咸脆花生同埋舉機影相,唯一理睬我的是一名體重達二百磅的大媽,突然施展蜈蚣彈般的翻生倒地嗚嗚咽咽地哭了起來,我用手提電話的聲浪儀量度到超過150分貝,比起打樁的聲音更要響,我實在懷疑應派她去特朗普身邊大哭,相信一定會令特朗普即時失聰,若施展這個生物武器中美貿易戰一定會叫停,美軍更會因為不知中國有多少如斯高能量武器而不會進攻中國,屆時美帝必敗!

講番當時,在大媽滾地之際,知客姐姐本來想制止他們,豈不知有個大媽突然出手推低知客,現場一片混亂,出手的大媽被保安制服時還在大叫「不知道在香港不可以隨便拉人名牌」。其實一片混亂的場景,我實在想連點心都唔想等,想打電話叫屋企人返去食杯麵算,但係現場仲有人叫囂「咁唔鍾意呢度咪走囉」,所以我決定坐番低,係都唔走去等班港豬和強人省覺。

走?不走?我仲有一刻鐘,我都誓死保護我的飲茶權!

 

備註:本文純為幻想之作,與社區組織者協會其幹事彭鴻昌無關,切勿對號入座。

 

作者:馮志豪

馮志豪
一名工作了二十年的註冊社工,近幾年在大學及大專任教,經常在想如何成為總幹事(就是總有幹點事)在中學生時代開始以筆名「詠憫」投稿予正義報章之學生園地,大學畢業後,筆跡及聲音出現於南都、癲狗、蘋果日報和香港電台。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 190065
Date: 2019-02-09 05:08:29
Generated at: 2019-12-16 05:37:10
Permalink: https://www.vjmedia.com.hk/articles/2019/02/09/190065/飲茶是人權