去完Speed dating 我發誓呢世都唔做HR!

 

 

「喂,陪唔陪我去speed dating ?」我說。
「下,去speed dating 咪即係話俾人聽我無人要囉,我唔去呀!」朋友阿玲說。
「唔會㗎喎,多個channel 識人啫,我哋又未到三字頭,去到都唔怕啦。」我說。
「我聽人講啲仔質素好差,一係就做媒,無謂去啦。」阿玲說。
「聽人講點及自己去睇咁清楚,我點都要去一次。」我說。

如果大家都有睇上一篇《Speed dating到底係點㗎?》就會知道小妹去咗人生嘅第一次speed dating,安全至上,最後我都搵咗個朋友陪我去,因為如果走嗰陣有人approach我而我又無興趣,我就可以同朋友打個眼色閃人,一條友可能就難甩身啲,點知最後呢招真係有用到。

「我係公務員!」有男人一開口就講呢句,我完全感覺到佢好似撻咗張皇牌出嚟咁,我差啲忍唔住笑,然後另一個就話:「我去過世界各地跑馬拉松!個人紀錄係xxx!」再嚟就係「我有幾間公司!」同埋「我有車,隨時隨地都可以去日本自駕遊!」大家好似玩鋤Dee 咁鬥勁,曬馬,其實大家各有喜好,我唔排除有啲人聽到以上呢啲真係會覺得你係筍盤,但係就吸引唔到我,sorry。

我覺得男人其實唔使急於吹噓自己有幾勁,我反而會睇下大家有無共同興趣,例如係咪都鍾意做運動、去旅行、打機睇動漫等等,如果識打籃球就正喇,因為我好鍾意睇人打籃球。女人亦一樣,我都唔會同你講我持家有道,識煮九大簋,平時喺屋企成日做家務呢啲假到無人有嘅嘢,都係普通講下平時鍾意做啲咩。

女人係有好強嘅直覺,有時講幾句嘢已經大概對呢個人有個perception,如果個人係奇怪嘅,講幾句已經知唔對路,有人竟然話我知佢喺房屋署做,然後問我知唔知房屋署係咩,家陣你當我係港豬?有啲就好明顯經驗老到,好識講嘢,幽默,會氹到你笑,或者特登記住你講過嘅嘢再講返出嚟,有啲player feel 所以我都唔鍾意,好在都有啲好正常,樣又OK,不過點解仲未有女朋友?有待發掘。

我都比較怕deadair,所以當大家都靜咗嘅時候我就會問下問題,開下topic,於是就變咗interview 咁,一日之內幾個鐘要interview幾十人真係好辛苦,首先自己要講嘢,同時又要記名記樣,又要記低佢哋講過啲咩或者有咩特點,因為最尾有張表要填,你要tick返你想keep contact 嘅人,如果對方都tick 你,大會先會俾個電話你(一小時後),我發覺男仔真係醒好多,根本無寫嘢,齋tick,可能齋望都已經tick 咗,然後果晚我竟然有啲頭痛,望住一堆whatsapp,都唔係幾想覆,自從嗰日起,我發誓呢世都唔會做HR,in 人真係好攰。

最後在此溫馨提示大家千其唔好亂tick,堅係有興趣先好tick,唔係盞麻煩。

 

P.S. 後來從其他男仔口中得知原來當日有啲女人係會西面或者語氣勁差,其實人哋都無得罪你,唔使比氣人受嘅,反而男人嘅態度個個都好好,值得一讚。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 190100
Date: 2019-02-11 03:11:21
Generated at: 2019-06-20 04:14:49
Permalink: https://www.vjmedia.com.hk/articles/2019/02/11/190100/去完speed-dating-我發誓呢世都唔做hr!