【塔羅個案】「我讀到 Master,佢得 Degree,我鍾意佢,佢無理由唔滿意我」

 

女仔最怕比人話港女,男仔最怕比人叫毒撚;有啲說話如果本身帶負面意思,係人聽到都會唔高興。例如我之前亦寫過文同大家分享「講野太直接」嘅故事,其實說話技巧真係一門課黎。

咁除左鬧人話人嘅說話令人聽到唔舒服,仲有咩狀況下嘅說話係會令人聽完心諗「做乜野」架呢?有,大把,例如好多人話「自大原因係因為自卑」,或者係嘅,因為無自信先要搵野刷存在感,不過亦都有人係「真心對自己好有自信」所以一開口就聽到人黑人問號,今日同大家分享我聽過嘅一個例子。

讀 Master,或者 Doctor,或者其他乜野勁嘅學歷,咁對於我呢啲由大學畢業話讀 Master 講左幾年到而家直情打消埋讀書念頭嘅人黎講,你係勁嘅,一來學院進修對我份工無實際用途,二來我其實係一個好唔習慣團體學院生活嘅人,讀 U 時我好摺,乜都無搞,放學就去開牌賺零用錢,所以而家你叫我返去讀書,唔好啦,呢個投資對我黎講無回報,不適用於我身上呀。

不過,我服你還服你,呢個唔係一個標準黎,要知道天外有天。

有個客,姑且稱呼佢為 Tom,就黎奔三都未拍過拖;佢話對一個同事有好感,想知大家有無得發展。好可惜開牌出黎,女士對 Tom 評價一般,認為 Tom 嘅類型並唔係自己杯茶,所以簡單黎講,就係落哂閘,「不了」。

我同 Tom 講完之後,咁通常呢啲情況,個客聽完都會收收地皮,「哦…」「咁好啦……」「我都知架啦哈哈」之類嘅回應幫自己打圓場;不過 Tom 嘅反應,就非常有趣。

「吓,無可能囉,我 Master 畢業架喎,佢 Degree 我都未嫌佢,佢有咩資格否定我?」

我呆左,原本想講一句「對唔住,我都係得 Degree 畢業,係咪我無資格幫你開牌?利申我諗呢一行讀到 Master 或者 MPhil 嘅占卜師應該都好難搵吓。」但係又怕略嫌太串,結果我收左自己皮,笑笑口就算。

又利申,Tom 先生嘅 Master 只係喺本地大學就讀兼唔係三大嘅最難入科目,講真,我手頭上讀書叻嘅客人大把,外國超名牌大學出獎學金邀請個客去讀 Master 嘅都有,咩長春藤,咩劍橋,咩 Trinity,聽到我眼都突埋,仲有一個我至今難忘,高大後生仔,怕怕羞羞,有禮貌又樸實,問多兩問,痴線,Eton College 出身。

而呢啲客,係絕對唔會大大聲周圍同人講「我 Master 架,你邊度架?」咁樣,個感覺太似黑社會叫喊「我跟大佬 B 嘅,你邊瓣架?」Too 江湖,其實反而令人聽完心諗,唔好咁啦,你嘅人生係咪淨係得呢張沙紙呀?個學位就等於你人生意義可以戰勝一切?愛與和平都擋唔到坦克啦。

總之,咁樣溝唔到女架,特別香港一地都係 Master 畢業,我唔理你為咩而讀書,但係「我有 Master 呀!」呢句說話,喺情場上面,真係唔會有咩額外吸引力架咋。

 

【塔羅牌個案分享】

 

 

作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 190122
Date: 2019-02-11 21:34:52
Generated at: 2019-09-24 02:49:34
Permalink: https://www.vjmedia.com.hk/articles/2019/02/11/190122/【塔羅個案】「我讀到-master,佢得-degree,我鍾意佢,佢