【嗚巴軼事】觀音山村——屬於沙田區但無車路落到沙田嘅村

 

 

最近,係司機嘅面書專頁,其中一個話題係「觀音山村」。原因係呢期好多師兄接單去觀音山村。

開始前岔開少少講吓「觀音山村」係搞乜東東荽茜蔥。根據「維基百科」,觀音山村位於沙田區(接近黃大仙北部)的觀音山上,但因往沙田的對外通道連接至大老山隧道收費廣場,作為隧道公司的管理範圍而被封閉,不能前往沙田⋯觀音山位處九龍群山當中,雖然屬於沙田區,但行車往沙田新市鎮轉折非常,須經過九龍;步行往沙田小瀝源卻又不算遙遠。

故事發生係情人節夜晚,筆者係九龍灣接到一枝柯打,去竹園接客(乘客V小姐同佢老公)。一開始行程見到目的地「觀音山村」,筆者心中大感不妙,萬萬想不到呢個「都市傳說」發生係自己身上,不過既然洗濕左個頭,本著專業嘅精神,筆者繼續行程(當然,乘客好好有俾貼士啦)。

行程期間,筆者講起呢期好多人叫車上觀音山。V小姐同佢先生就分享左一件近期但冇咩人留意嘅新聞——來往黃大仙新光同觀音山嘅小巴停辦左,仲係一個月前嘅事。據講係因為乘客不足而停辦,不過因為咁,條村形同一個孤島。雖然村民們以搭的士作出入嘅方法,不過由於的士哥哥嘅優良服務:成程車瘋狂爆粗。成村人經過商議之後,決定罷搭的士,轉為叫車。而村裡面曾經出過兩位師姐(做司機),不過由於19政府喊打喊殺,搞到兩位唔敢再做。但依然不改村民叫車嘅決心。

而V小姐嘅先生就分享左一啲有關觀音山嘅往事。話說觀音山居民曾經申請整條車路落沙田小瀝源,當時政府其實批左,不過由於當時班村民衰心急,自己出左七位數開左條路(稱為「百萬大道」),條路開左一個月說俾當時政府搵石墩封左條路,加上之後起左大老山隧道,原本條路嘅沙田終點變左隧道收費區。於是條路就只能行人不能行車喇。不過行落沙田都係幾個字,唔算耐。

咪以為條山路好窄呀,泥頭車、16噸貨車都應付自如㗎。V小姐仲話,佢哋屋企買傢俬搵貨車送上山都係咁,冇問題。不過時值個山最大霧嘅日子,筆者都唔敢開太快。

 

【嗚巴軼事】

 

作者:車上人間

一個男人一架車,見盡香港人和事。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 190259
Date: 2019-02-15 04:39:28
Generated at: 2021-12-05 07:56:20
Permalink: https://www.vjmedia.com.hk/articles/2019/02/15/190259/【嗚巴軼事】觀音山村-屬於沙田區但無車路落