禁電子煙真的為了香港人的健康?

 

特首在《施政報告》中出奇不意,要將電子煙斬立決。啱啱睇新聞,見到政府原來已經將法案交上立法會,《2019 年吸煙(公眾衞生) (修訂)條例草案》禁絕電子煙。法律文字不在此討論,電子煙是好是壞亦唔討論,我想講下另類睇法。

本屆特首深得最高領袖青睞,最重要嘅似乎係特首永遠將國家嘅事,優先於香港福祉,更不要說香港民意。急急禁止電子煙,關心香港人健康?醫院爆晒煲佢做咗啲咩?咁急禁電子煙,似乎要向祖國嗰邊諗。而我早幾日見到某條新聞,話全世界最賺錢嘅「公司」係中國煙草總公司(同時亦係国家烟草专卖局,所以佢又唔係一間正常嘅公司),再GOOGLE一下,見到幾條唔顯眼嘅新聞,係巧合?係我有太多聯想?禁電子煙莫非同中煙國際上市、中國煙草專賣有關?

首先係舊年年尾(2018年12月28日),国家烟草专卖局嘅中煙國際(香港)有限公司向香港交易所交了文件申請上市。我無細讀招股書,就參考咗另一篇相關文章嘅內容,此文謂中煙國際在2018年才開始出口電子煙之類嘅產品,九月就只賣咗180萬人仔多啲。 (美國嘅Philip Morris International,2017年在亞洲賣咗33億美金嘅電子煙,主要市場係日本。)有新聞話大陸出口電子煙具全球市場佔有率達九成,似乎又係OEM代工,賺嘅錢非常有限。壟斷嘅國家隊,出口只得雞碎咁多,難以令人相信會有民企在欠缺本土市場之下會有力挑戰外國一眾大型煙草公司。

我再睇下中國嘅煙草市場,原來國家專賣壟斷嘅煙草行業係好誇張︰「2018年,我国烟草行业实现税利总额11556亿元,同比增长3.69%;上缴国家财政总额10000.8亿元,同比增长3.37%;实现工业增加值7877亿元,同比增长4.88%,为国家经济社会发展作出了突出贡献。」(新華網消息刊於國家烟草專賣局官方嘅.GOV網站)。

一萬億人仔上繳國庫係咩槪念?中國政府2018年總收入(國稅地稅萬萬稅、賣地罰款打老虎、國企盈利、全包)係26萬億人仔,呢間煙草專賣佔3.8%。香港政府2017-2018收入6,124億港紙,約5,266億人仔,一半多啲。香港同一年收咗223億差餉,寬減咗1億,用差餉徵收率嚟反推算,全香港一年嘅租值估係4,500億港紙,即係俾你買晒全香港嘅樓嚟收租都唔夠佢喺大陸賣半年煙仔。

同正宗企業比較一下︰2017年,工商銀行賺2,816億、建設銀行2,412億、中國銀行賺1,657億、農業銀行1,882億,賣煙賺錢勁過四大銀行加埋一齊。騰訊賺725億、阿里巴巴賺614億,科網巨人連十分之一都未有。香港啲細公司無謂比︰匯控賺725億港紙、長和賺351億、中電賺140億。美國公司全世界最勁,2018年嘅業績出咗,蘋果(9月年結)2018年賺595億美金(4,000億人仔,一半都無)、股神間巴郡賺449億美金(3,000億人仔),FACEBOOK賺221億美金(1,500億人仔)、花旗銀行賺167億美金、高盛賺98億美金,都費事計喇。

一年賺咗一萬億人仔,即係賣咗幾多煙?本股書話中國有三億煙民,502萬個賣煙嘅零售點POS。國家烟草專賣局有數字話佢銷售收入14,350億人仔,呢個估佢係批發價,因為無見過「國家烟草專賣局直營店」,咁計埋零售嘅毛利,兩萬億零售總額(即係消費總值)應該係低估咗。

賣煙害人,但真係賺好多好多錢,所以,中國政府可以放棄兩千年有多嘅鹽鐵專賣,依家專攻一瓣。

講咗咁多數字,係想俾大家一個槪念,賣煙仔對國家有幾咁重要!

咁佢喺大陸賣煙又關香港禁電子煙咩事?

中國煙草係官僚經營,專賣零競爭,佢地賣電子煙出口兩百萬人仔都無,你估佢地有幾多競爭力?有報導話大陸生產好多電子煙,外國嘢都係中國製造。呢個講法我搵唔到支持,寧願估佢最多做到OEM,因為電子煙咁好搵嘅嘢國家隊唔可能咁弱得兩百萬出口都無,真係留番俾民企發達咩?

之前講咗,一間Philip Morris International在亞洲市場,唔計中國都賣到33億美金嘅電子煙,唔知另外嗰三大煙草公司仲有幾多?佢地嘅產品有幾成熟同強勁?佢地手上有幾多相關嘅技術專利?以外資巨企嘅玩法,一定儲咗好多專利,慢慢攞出嚟去GROW個市場。同時,侵侵在打貿易戰,迫大陸開放市場,電子煙會不會係其中一個戰場?中國又願唔願意保護洋人喺電子煙呢個範圍嘅技術同知識產權?估計大陸煙草當局應該幾驚電子煙流行,因為就算有專賣保障,都難以保護市場,驚大陸嘅電子煙產品做不到外國貨嘅品質水平,走私禁之不絕也。每年二萬億人仔嘅煙仔消費,官僚專賣無咩競爭力,外國私企眼中嘅超級大肥豬也。

香港地理上連住大陸,自由港有如無掩雞籠,金融自由又多外資難以睇實,天然就係外國電子煙入大陸嘅走私基地。如果香港唔禁電子煙,任由電子煙流行,一則教壞大陸消費者,二則成為電子煙產業嘅「物流中心」、「洗錢基地」。任何產品大陸無而香港有,如iPhone 3同iPhone 4一樣,俾香港賺一筆,走私利錢攞一份是也。

電子煙隨時令大陸政府唔見千億以上,中煙國際又要上市在香港金融市場為國家撲水,呢啲係大局嚟,點可以俾香港呢個小地方搞亂檔?咁現屆香港政府即刻動作敏捷,擔君之憂,補好個漏洞,正常不過。

以上,純粹斷估無辛苦,將啲新聞穿鑿附會,參考過嘅網頁就喺下面,讀者可以望望,再諗諗有無啲更有趣嘅陰謀論。

另外,香港有幾多個AO會諗到國家要咩嘢,佢地又咁啱喺呢個局到做呢條法案。望埋其他新聞,令我諗起以前西環有位幹部叫曹二寶,佢一早話咗俾你知香港政治依家點玩。

 

〈中煙國際(香港)有限公司招股書的申請版本〉,2018年12月28日

〈Philip Morris International Annual Report 2017〉,2018年3月2日

〈中国烟草旗下公司拟赴港上市:不差钱,融资将用于这些方面〉,2019年1月4日

〈回顾2018年烟草行业十大新闻〉,2019年1月18日

〈中国烟草孙公司将香港上市!中国烟民占全球1/3 〉,2019年1月7日

〈2017年全国卷烟市场分析〉,2018年7月22日

 

作者:白恩樑

好讀書,不求甚解,每有會意,便欣然忘食。(陶潛《五柳先生傳》) 為天地立心、為生民立命、為往聖繼絕學、為萬世開太平。(張載) 子曰:「飯疏食,飲水,曲肱而枕之,樂亦在其中矣。不義而富且貴,於我如浮雲。」(論語.述而) 創業要準備一桶血,而最大的創業就是打天下。(王強,《亞洲週刊》訪問2009)

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 190441
Date: 2019-02-19 04:42:35
Generated at: 2020-10-31 18:55:10
Permalink: https://www.vjmedia.com.hk/articles/2019/02/19/190441/禁電子煙真的為了香港人的健康?