【嗚巴軼事】「共乘汽車」前景?睇睇香港人要咩先. . .

 

 

到底所謂「共乘汽車」係香港呢個地方仲有冇得玩?作為司機黎講,筆者個人願望係長做長有,最好客永遠多過車。但實際上,其實筆者對於「共乘汽車」係香港黎講,前景都唔係太樂觀。

第一,呢樣都人所共知,司機們身處嘅大環境並不友善。如果大家出街坐車,望吓啲的士同紅Van後面塊擋風玻璃,你會見到好多白紙黑字寫住「取締白牌車」之類嘅標語。又,大家如果有留意近日嘅新聞,政府擬修例加強對「白牌車」(講到尾都係講緊個台)嘅罰則。不過好笑嘅係,「共乘汽車」係由創新科技署引入黎香港嘅⋯⋯講到尾,「共乘汽車」面對緊嘅係既得利益嘅阻礙。真係要發展到好似星加坡、台灣、以至美國咁樣長玩長有?似乎就唔係太容易。

第二,香港嘅文化多多少少都唔係太適合「共乘汽車」嘅生存。香港文化核心係咩?民主?自由?法治?平等?係「快」呀!「我而家叫車你下一秒就要出現係我面前!」筆者之前曾經分享過,有客人叫左車之後,轉個頭就上咗架的士走人。而更常見嘅係,有啲客見要等三分鐘以上,或者見你條路徑唔似去緊佢度(上個客未落車已經要接下一張單),就會即時取消張單。以上呢啲情況多數發生係本地香港人(華人)身上。另一方面,個台又鐘意要司機兜個圈黎接客。於是乎,你會見到個服務效率追唔上需求,倒返轉黎講,就係啲客要快,你唔即時到,佢哋寧願係街揮手。長期下來,要維持顧客忠誠度就好難喇。正所謂有客先養到班司機呀嘛。

第三,個台自己唔爭氣。上面講過,個台係創新科技署「招惹」返黎嘅,基於「不能否定其他部門嘅決定」,警務處要掃場都掃唔到個台,最多只能搞啲司機。不過,大台係爭取合法呢方面似乎亦毫無寸進,甚至乎係無聲無氣,你見修例個陣真係半隻字嘅聲明都冇㗎。另外,我哋又回帶睇吓上年9月,有位師兄開工途中因爲隱疾發作引致交通意外之後,個台嘅處理手法係點?唔好提咩慰問撫恤之類,簡單幾行字聲明都冇(司機們內部都見唔到),對於第三者保險問題一開始又冇即時澄清,卒之前前後後成兩個月後先至拎得到出黎,不過就算有,份保險都冇保障到一班佢口中嘅「司機夥伴」。雖然至今仍然好多人叫車/做司機,但係只係出於「唔想搭的士」/「搵錢」而「膽搏膽」坐車/開工,個生態其實唔係咁健康。

話就話「共乘汽車」發展空間唔太樂觀,不過多得的士業界個種堅持——堅持自己態度冇問題、唔需要作任何改善、完全拒絕任何競爭。「共乘汽車」係香港尚有一絲生存空間。不過真係想朝著健康嘅方向發展的話,條路仲係好遠。

 

【嗚巴軼事】

 

作者:車上人間

一個男人一架車,見盡香港人和事。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 190492
Date: 2019-02-21 03:55:56
Generated at: 2021-12-09 06:08:34
Permalink: https://www.vjmedia.com.hk/articles/2019/02/21/190492/【嗚巴軼事】「共乘汽車」前景?睇睇香港人要咩