【真人真事】拍拖三週年,男朋友同我講「我知道我同你分手會後悔,但係我唔試下追嗰個女仔我都會後悔一世」(上)

 

有曰人一生總會愛上幾個人渣。細個聽到呢句野,覺得人渣不外乎都係一腳踏兩船、當人水泡,甚至以為一定要天姿國色咁先會俾人呃,亦諗住做得人渣都唔會樣衰得去邊。直至俾我遇到一個,我先知道我既想法全部錯晒。

話說我同人渣一齊左岩岩好三年,頭嗰兩年半都係好難受既時光。點解?因為佢啲性格都唔係一般既難頂,脾氣又暴躁,芝麻綠豆既小事都要爭論到底,就算鬧到我喊晒都唔會心軟,仲試過俾佢鬧返我「你而家係用眼淚令自己處於弱勢,想同我開戰丫嘛!」個人已經難相處,個樣仲要唔好睇,又少頭髮又爛面⋯⋯結果搞到我同佢相處要處處忍受之餘,對住家人朋友都只能報喜不報憂,因為基本上知道佢其貌不揚又對我唔好,係人都會叫我分手⋯⋯

咁點解咁辛苦又要同佢一齊?一齊之前我地本身已經係大學已經係無所不談既best friend,我又欣賞佢夠上進咁,之後佢追左我成兩年先一齊,佢對我好嗰陣又好到可以令我有公主病⋯⋯總之到最後就係,我太愛佢,愛到有數唔盡既鬧分手最後都係我自己唔捨得去挽回返佢。因為我好似無左佢唔得,我以為佢都係。

最後一次鬧大交之後,我地有大半年時間無再鬧過交,我亦以為我地終於可以和平相處落去。有一日,佢突然間語帶雀躍咁向我提起我地合唱團既一個小妹妹:

「原來新黎嗰個阿慧都有睇我睇開嗰套大陸劇架!同埋原來佢都會剪片架,仲會寫文添呀!」

語氣中透露出終於遇到一個知音既雀躍。我忍耐內心既小悸動,半開玩笑咁同佢講「哇咁你唔好睇佢啲文啦,一陣你愛上佢就唔好啦。」

佢成日都話我多男仔friend(一隻手數得晒係幾多既),而佢身邊就全部都係男人,所以多數一講呢啲話題佢都會果斷否認,話自己係最專一嗰個云云。估唔到佢竟然語結:「咩⋯⋯咩呀⋯⋯我無呀!」

當其時我半工讀,又好忙準備緊考試,都無將件事放係心上。後來我終於考晒試,好開心終於可以約佢多啲,但佢一路都話返工好忙,text都覆少左。

之後有一晚,我同班朋友食飯飲左幾杯,叫左佢黎送我返屋企,點知佢上到黎又趕住走咁,唔好話趁醉搏下懵,連平時每次見面都有既拖攬錫都完全欠奉。酒精助攻下,我鼓起勇氣同佢提出內心既疑問:

「你做咩對我冷淡左咁多,係咪唔鐘意我啦?」

其實我咁問,都係想佢講「唔係呀,只係呢排返工太大壓力⋯⋯」咁氹下我啫。

點知佢話:
「係呀。」
仲話「本來我都諗住重拾返對你既感覺架,但係你而家都咁講,返唔到轉頭啦,分手啦。」

「下?!」

嗰一刻直情係個天要冧落黎咁晴天霹靂,勢估唔到一個禮拜前仲將I love you掛係口邊,點鬧交點嬲都唔捨得走既人,會突然之間話唔鐘意我,仲話要分手。

所以諗都諗到,我即刻問佢係咪鐘意左第二個,佢唔認。之後佢係咁數我好多問題,話我同男仔friend食飯(查實我每次都有交有帶,更何況你都唔會係今日先講你接受唔到?),話唔知我最近同咩人飲酒(一班人食大牌檔同打邊爐囉,你都在場架先生),話我唔影schedule俾佢睇(點解要影?同埋日日溫書影乜鬼?),話我突然間鐘意一隻新既公仔所以我變左好多(?!),最痴線係佢話我最近剪短頭髮,係因為我同一個對我有好感既男仔有路(因為人地都係短頭髮)⋯⋯WTF?我聽左啲乜野呀??

總言之,就係一堆大纜都扯唔埋岸既理由,想話佢已經無辦法再信任我,「逼於無奈」只好放棄呢段關係。當時既我只係好想撇清呢啲莫須有罪名,唔想俾佢同人講我係一個唔識做既女朋友,跟住落黎嗰一個月所謂「俾個機會大家重新建立感情」期(佢話),我放低面子,做好晒佢指控我既野,影schedule,報備位置,有咩都同佢講,唔同男仔friend見面。我諗住只要無晒我嗰啲「問題」,就會知道問題係佢度。

到最後當然就係無用,我忍唔住搵佢攤牌。佢半推半就終於承認自己鐘意左第二個,但死口唔肯講係咩人。又原來係我考試嗰排佢約左女仔食飯行海皮,當然亦唔肯講係咩人了。大家都識既,影響我同佢地既關係就唔好喎。

如果有得時光倒流,我一定會返去嗰陣時既自己隔離大巴大巴車落自己度,因為我竟然會同佢講,我唔介意你對人動心,只要你最鐘意既仲係我,我地都仲可以行落去。

然而佢係咁樣同我講:
「係呀,我同你分手我會後悔,但係我更加想試下追嗰個女仔,如果唔係我都會後悔一世!」

仲未夠絕,驚死我仲未死心既佢仲補多左句:
「我而家揀,都一定唔係揀你,我第時會揀返你既話,係因為我無得揀咋。」

兩個人都已經無得返轉頭,所以我就同佢分左手。當晚就執晒三年份量既野去掉,第二日連合唱團都quit埋。我以為我遇到既不過係見異思遷咁簡單既故事,亦可以就此作結。但原來真正令我會叫佢做人渣既,係佢分手之後所做既事⋯⋯

 

作者:自田丌

自田丌
夢想係養一隻金毛尋回犬同一隻臘腸狗。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 190504
Date: 2019-02-21 14:02:49
Generated at: 2020-02-17 11:33:21
Permalink: https://www.vjmedia.com.hk/articles/2019/02/21/190504/【真人真事】拍拖三週年,男朋友同我講「我知道