【真人真事】拍拖三週年,男朋友同我講「我知道我同你分手會後悔,但係我唔試下追嗰個女仔我都會後悔一世」(下)

 

上回提到,拍咗拖啱啱好三年嘅男朋友同我講要追第二條女,所以要同我分手。

俾人抛棄一定係痛,射咗波冇返工返學係屋企喊左幾日,一諗到要同屋企人講令佢地擔心自己,個心就更加痛(點知佢地知道之後好開心話想我飛左佢好耐⋯⋯人生⋯⋯)。但另一方面正因為佢用左咁狠心嘅方式離棄自己,我先會覺得無野再值得我留戀,所以我喊左幾日就收拾心情,重回生活正軌。

嗰陣時有人問我,你唔覺得佢好仆街咩。我話唔覺,感情係兩個人嘅事,佢只係做咗佢嘅選擇,我冇得怪佢。

勢估唔到,有如韓劇劇情一樣既故事會發生係我身上⋯⋯

分手之後第六日,我收工行出公司門口,突然之間,我聽到急速嘅腳步聲,「噠噠噠噠」咁,有個熟悉既身影跑埋黎。

一見到係佢,我即刻走都走唔切,點知就俾佢一手捉住我:
「你可唔可以俾一個泡芙嘅時間我,聽我講嘢?」

問可唔可以,但原來係冇得我答唔可以,佢一隻手攞住個紙袋,另一隻手捉實我唔俾我走,係咁同我講佢好後悔,好想同我喺返埋一齊。WHAT??

「係我嗰排返工太大壓力,一時衝動先會講分手,其實我唔係真心鍾意個女仔架!」我差啲以為我聽錯,大佬我一個女仔係一個月裏面挽留左你三次,你為咗飛我,連你發夢見到自己同嗰個女仔結婚都同埋我講,而家你同我講係一時衝動?又唔見你一時衝動衝出馬路俾車撞?

我都唔記得當日係公司樓下講左幾多億個「唔好」、「你俾我走啦」,淨係記得講講下佢開始跪我,喊晒口咁話好對唔住傷害左我,又挨又西咁叫我念在我地有過咁多美好回憶俾個機會佢⋯⋯老實講都搞到我有啲心軟症發作,只係同自己講唔可以下巴輕輕俾佢講幾句就箍到煲,完咗就係完咗。扯返佢起身之後,我同佢講我原諒你,我哋可以做返朋友。佢話好。

或者我係唔想同呢個同行左五年既人留有遺憾,所以我執意想將舊情轉化為友情,咁我個心就會好過啲。
痴線,我真係傻豬仔黎。

之後我哋做咗兩個禮拜「朋友」。好似以前咁樣,傾下返工嘅嘢,又講下唱歌嘅話題。有時半夜夜長夢多,又有得同對方講下,好似會無咁放唔低。佢有約我食飯,我又有搵佢睇戲。中間佢又寫信又送禮物咁,一邊話我先至係佢最想搵嘅另一半,一邊就係咁問我佢以前有咩做得唔好,佢會努力去改變,成為更好嘅人云云。

呢段日子我一直認為佢都係攞個心出嚟同我相處。

佢加返我Facebook,隔三兩日佢就會打下啲叫春status,話咩「失去之後才學懂珍惜」。我同佢講,你呢啲叫捨棄,唔係失去。佢堅持,因為佢都好痛悔喎。

終於有一日,佢問我「你係咪真係唔會再俾機會我?」
我話係啦,其實我哋都係唔夾先至會分開,可能我哋真係做朋友會好啲。

然後佢話:
「而家似係你一早就想分手多啲喎。」

嗯?????

嗰次之後,我哋就冇再見過面。過多幾日,我見佢突然間冇再主動搵我傾計,我亦都主動同佢講不如大家就咁算啦,無謂勉強,就冇再聯絡。當時我仲有返合唱團,要去埋最後幾次練習,見到佢一副落寞神緒躲避我嘅眼神,仲為佢感到心噏⋯⋯

時間好快又過咗一個月。有一日,我無聊碌下個whatsapp 諗住八卦下人地啲profile pic(我成日都會),突然之間見到佢轉左頭像。

「好心啦,髮線高就唔好學人影高炒啦⋯⋯」我一邊好黑心咁諗,一邊打開佢個頭像,見到隔離有半個女仔頭。

唔知點解直覺已經話到俾我知發生咩事,我諗我嗰刻心跳應該標到有200,手震震咁打開合唱團嘅群組,打開佢三個月之前提起過嗰個阿慧既頭像—

果然係同一張相⋯⋯

更加狂野嘅係,係嗰一晚,佢兩個竟然同一時間係instagram 貼文話「一個月快樂❤️」

一。個。月。?
一個月之前你唔係仲求緊我同返你一齊既咩?

屈指一算,原來喺佢問我「我哋係咪冇機會啦」之後一個禮拜,都冇,佢哋就一齊左。唔使問都知道,佢哋一定係嗰幾日入面由零開始既,佢話我多男仔friend 話左咁多年,佢自身一定好清高,又點會容許自己有第三者呢?

所以,我都好大方地搵佢講左句恭喜,佢亦都好有禮貌地應左我thank you。

之後,不斷有零星既合唱團團友走黎問我,「明明前排佢先至喊晒咁同我講好後悔分手,點解可以咁快就同左人一齊?」「點解要喺你仲喺度嘅時候公開?唔會好傷害你咩?」

我笑而不語。

因為,我終於發現一切一切都係按照佢嘅劇本執行。對我冷暴力,我就會忍唔住提出分手;但係我無,咁就生堆硬砌話我有野瞞住佢,令佢「被逼放棄」;之後打電話俾朋友喊,喺Facebook 打幾個post,就可以表現得痛悔;及後走黎跪地箍煲,以我嘅性格一定會回絕,佢就可以話「而家係你想分手先岩喎」;順便搵我講下佢有啲咩可以做得更好,做埋佢嘅戀愛顧問;最後當然光明正大同人地係埋一齊,所以一個月咪可以自自然然公告天下囉。毫無破綻,中間亦絕無半點overlap,哦咩嗲拖。

但其實打完都覺得好心累。點解唔可以簡單少少,係你講完「我唔追嗰個女仔會後悔一世」之後就真係去追人,唔好再返嚟搵我呢?搞咁多手腳唔想俾自己做衰人,最後做咗個人渣,何苦?

事過境遷,瞎眼的終得看見。感激人渣給我上了一課呢啲老土野我就絕對唔會講,因為佢最後留俾我既不過係一堆想丢棄既回憶,對自我價值既質疑,同埋一個我最唔鍾意食既朱古力味泡芙(到底點解會cheap到買泡芙黎箍煲⋯⋯)。以前一齊得辛苦嘅時候我成日問上天點解要咁樣玩_我,而家終於知道其實個天係想打救我,只不過係我一直都唔肯放手咁解。感謝上天幫我係身邊拎走一舊垃圾,真好。

 

作者:自田丌

自田丌
夢想係養一隻金毛尋回犬同一隻臘腸狗。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 190573
Date: 2019-02-22 21:50:18
Generated at: 2019-05-22 18:13:56
Permalink: https://www.vjmedia.com.hk/articles/2019/02/22/190573/【真人真事】拍拖三週年,男朋友同我講「我知道-2