究竟呢個世界上,係咪真係有無條件既愛?

 

 

是日同友人共進晚餐,交代一下近況,亦談了感情狀況。呢位友人係我同前度相識多年既好朋友。

一段多年既感情,最近完結左,而完結既原因,可以話複雜可以話簡單。食飯時又忍唔住吐一兩句苦水:「我真係試過放低,但我做唔到,我仲好想關心佢對佢好。」。友人忍唔住出聲,叫我係時候放手,今次唔同上次,佢唔值得你咁樣。

我地一齊既時候,開心既時間遠多於唔開心。建立左信任同埋安全感。我地係由朋友成為密友再成為情侶。我地好了解大家既諗法同有一定既默契。

但係佢眼中,走遠了,愛情變成感情,有點似親人,好像就只剩下習慣,沒有愛情。然後,佢選擇放棄,然後重新上路,建立一段新關係。

佢係一個好認真既人,至少大家相處時佢對段關係好認真。我反思究竟出現左咩問題,發現其實每一段關係出現裂痕都一定係雙方既責任,而我都有,諗番起過去種種我亦自責內疚,從來無諗過原來感情真係要好好維繫。朋友忍唔住出聲:「你唔應該淨係自責,佢自己都好自私,你淨係諗你當初有咩做唔好係無意思。你太過美化佢既一切,將佢既好放得太大。」

我知道,佢好自私,一段咁難得既感情,一段陪伴大家成長,陪住大家由中學到大學再到踏入社會既感情,佢無諗住一齊努力然後選擇放棄,甚至去發展一段新既關係。佢無話過比我知原來佢對段感情有迷茫,亦無話過比我知佢不安。

我曾經諗過,我係唔係太美化佢既一切,我先放唔低。

我唔係一味盲目咁認為佢好,將過去無限美化。而係係咁多年大家真心付出相處既時候,我太了解佢,我了解佢為人,甚至可以理解點解佢要離開。一段關係長跑到一個地步,總係會有點動搖:「呢個人就係我以後既伴侶?唔通以後一世都係同呢個人過?」當動搖黎到既時候,大家缺乏好好既溝通,再加上有新既衝擊來臨。而佢係一位好完美主義又好情感主導既人,佢覺得段關係已經出現問題,捨得捨得,或者我放棄就可能會有更完美更好既感情。可能呢個人好好,同我可以相守到老,但當下既我唔想擁有一段無左浪漫同愛情既關係,唔試點知有無?然後,佢好勇敢,忍痛放棄一段感情,去嘗試建立一段新既感情。無錯,我會話係一種勇敢,一段長久關係,要放棄其實唔容易,感情好似好難分對錯。我表達左我對前度既了解,友人既態度軟化左:「的確,佢真係呢種人黎,我開始明白佢點解要咁做。」

「但係究竟你點諗?你成日淨係講佢既諗法,去理解佢,咁你自己呢?你唔應該淨係諗佢,你要知你想點先得架。」

的確,由分手到呢家,我一直去解釋點解佢會咁做,但其實我從來無講過我自己點睇。係友人眼中,我仍然係將佢好處放大,無為自己諗過既人。

我點諗?我其實唔係一個盲目去等,唔知自己想點既人。

我係一個好少講自己野既人,我人際關係還好,但其實我信息來來去去都係個幾位,實際上名乎其實一位獨家村。從小經歷既事唔可以話多但亦唔可以話小,造就左我唔容易信任人、逞強、隱藏自己既真實性格,我過去既伴侶都唔能夠令我百分百信任。我都算開朗正面樂助幫助同關心身邊既人,我唔介意被人依賴依靠,但我好少去依賴別人。而佢既存在,令到我好難得地有一個人可以令我敞開心扉、將我既軟弱公開予他以及絕對的信任,進入我既堅強但同時又軟弱既內心世界。至少係我暫時既人生,佢可以話係唯一一位令我咁信任既人。或者未來會有第二位,我唔知。

而且,我覺得佢係一位唔錯既男性,我好欣賞佢。同時我地好了解同包容大家,想法亦好相似,相處時亦很愉快,我一直都好相信,如果有將來,大家生活應該都幾美滿同和諧。

我既未來藍圖,好明確咁有呢個人既存在。好多人成日都話,我既另一半唔係我既最愛。我唔希望自己既未來會變成咁,我唔認為人應該咁樣,如果我既另一半唔係我既最愛,我寧願唔要,我好固執。不過最近發現,可能有時人生就會有一種無奈,就係若果他日佢同新伴侶結婚,我諗我既另一半真係唔係我既最愛了。但我仍然希望等待,繼續固執一下。不過,等待真係好痛苦。

我不停思考點解我會想等,除左以上種種原因,仲有一種我都解釋唔到既情感。

我知佢係幾好既男仔,但同時佢亦都有不少缺點。就算佢同第二個一齊放棄我,我都能夠理解同明白。唔知因為,當我明白點解佢會放棄時,我嬲唔落,我甚至能夠感受佢放棄段關係時既內疚、傷心、迷茫以及痛心,我會好想去呵護佢,包容佢。原來呢個世界上,有一種情感係你會唔介意自己所付出既愛無回報。

我知道自己做緊咩;我亦知道佢呢件事上既唔好;我知道咩係唔岩;我亦知道要自愛,要好好發展自己,做好自己。但無論我點努力去嘗試放棄,我都係會想去對佢好。我曾經覺我鄭中基首《無賴》好唔岩聽,花心講大話犯錯貪新厭舊既行為點容忍,邊會有人咁豬仲去鍾意一個咁既人。但原來當呢個人出現既時候,真係會可以包容到。我唔認為自己卑微,我仍然好了解佢既行為某程度上係仆街,但我就係包容到。無論點樣去細數佢既缺點,我都仍能包容。

我知道日子總是要過,我希望自己可以一路向前變得更成熟更有內涵更認識世界,但亦希望係路上為佢默默送上支持,係佢迷茫時給予鼓勵,我都唔知點解釋呢種情感。

或者世上真係有一種愛,無論對方係一個點樣既人,又或者佢做左令你好傷心既事,都可以包容同唔計較條件?

「我,仍然會冷靜聆聽
仍然緊守於身邊
與你進退也共鳴

因世上的至愛 是不計較條件 誰又可清楚看見」

 

作者:自盈其說

辦公室中一名小嘍囉。多愁善感,對很多事總有些莫名感悟,愛痴人說夢話,自說自話。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 190783
Date: 2019-03-01 05:31:34
Generated at: 2019-03-19 10:47:00
Permalink: https://www.vjmedia.com.hk/articles/2019/03/01/190783/究竟呢個世界上,係咪真係有無條件既愛?