有啲朋友總係好似你嘅親人

 

 

我係獨女,亦有一班都係獨生嘅朋友,我哋永遠都唔會感受到有親生兄弟姊妹係咩感覺,唔知係咪因為咁,由細到大我都好重視同「朋友」嘅關係,有時相處耐咗,有啲朋友仲會比到我好似親人一樣嘅感覺,唔係一般好朋友咁簡單。

人生總有起跌,例如失戀、失業,或者係工作上有遇到錯折、身體有毛病、甚至係有親人離開嘅時候,有時真係會覺得自己跌到落谷底,朋友嘅一句「唔驚喎你到谷底就會絕地反彈」、「我永遠都會喺你身邊」,真係會令人好感動。

成功嘅時候大家都會恭喜你,捧你上天,但係雪中送炭就唔係個個都做到,當你最失意嘅時候,你就會知道邊個先係你嘅真正朋友,邊個只係花生友。你失戀,佢仲傷心過你,因為佢驚你會接受唔到,驚你只係扮堅強話無事,驚你偷偷地喊咩都唔話佢知,佢真心希望你可以得到幸福,但佢可以做到嘅只係喺你身邊默默咁陪住你;你失業,佢仲擔心過你,驚你唔夠錢使,驚你搵唔到工會好大壓力,於是出嚟食飯都要爭住比錢請埋你果份。

你身體唔舒服,佢會逼你去睇醫生,要你飲多啲水早啲瞓、M到就唔比你飲凍嘢,提你飲薑荼、天氣凍咗佢會提你著多件衫,久唔久又提你要做body check,分分鐘仲煩過你阿媽,但你會感覺到佢嘅細心同關心。

呢一個「佢」,其實代表住好多人,因為我好好彩咁識到好多真心嘅朋友,甚至係讀者,多謝你哋,我而家已經無事,重新出發。如果你身邊都有一個好似親人咁嘅朋友,你一定要好好珍惜,千其唔好因為工作忙、要拍拖、好攰等等嘅理由忘記咗關心佢,朋友係一世,最後一定要講返句好老土嘅說話:「友誼永固呀喂!」

 

P.S. 有個好好嘅朋友就嚟要飛喇,雖然唔捨得但都想喺度祝佢一路順風。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 190898
Date: 2019-03-04 18:21:50
Generated at: 2020-02-19 22:04:10
Permalink: https://www.vjmedia.com.hk/articles/2019/03/04/190898/有啲朋友總係好似你嘅親人