【嗚巴軼事】就係唔想搭的士先叫你爸,點解大台要倒轉行?

 

最近一單新鮮滾熱辣嘅新聞,非個台同的士公司合作莫屬。不過琴日最新消息,單嘢係滑鐵盧咗,的士公司臨時甩底,得返鬼婆自己一個獨腳戲,唱唔起。對於呢件事,筆者嘅反應係:「吾心甚慰」。因為筆者都覺得大家都冇咩合作空間。

正所謂「百貨應百客」。叫得的士就通常年齡層比較高嘅一群,而且唔會係好常用智能電話或者信用卡嘅人。因為你要叫車,首先你要有一張信用卡、一部智能電話,最重要你識得用部電話下載軟件、登記帳號同叫車。所以呢班人如果要車就一定係街遞手。另一方面,用得個台叫車嘅,都受過的士唔少「恩惠」,基本上打死都唔會再搭的士。所以,根本客路都唔同,你估真係「溝埋做瀨尿牛丸呀笨」?

至於個台點解要咁做?筆者覺得只有一個原因:冇車。筆者曾經分享過。筆者試過好多次要行成超過10分鐘去接客,甚至去緊接客途中俾客cut單。而同時,啲客又同筆者呻成日都叫唔到車,或者等咗好耐車都未到。久而久之,啲客見冇車就唔叫車,唔叫車就冇生意,冇生意就唔開工,惡性循環。於是個台諗住借的士佬手黎解決呢個問題。因為而家周街的士,隨時撳個app即刻有車(妄想)。但係成件事就本末倒置,人哋就係唔想坐的士先叫車呀嘛,你又走去搞的士做咩呢?

可惜,個台冇諗過問題嘅所在:個台對司機唔好(不過佢哋唔覺得)。

在錢,個台食水深。抽四分一車資,其實普遍客都覺得多。再者,以平價版叫車黎計,有時個台收得平過的士,扣返個台嘅抽佣,基本上可以係的士收費嘅六成。當然你可以話,玩得就預咗,但係如果個台純粹係食佣還好,個台仲會巧取豪奪呢!個啲「食加乘」、「食夾棍」嘅手段真係多不勝數,佢就收到個客貴一貴,最後你只會得返佢收嘅一半。車同油就你出,仲要出黎跑,佢就齋食。就算出啲咩「路路賞」之類嘅獎金計劃,又唔見得真係鼓勵司機長期做(前文已述)。搵又唔係搵得多,皮費又唔輕,仲要有俾人拉嘅風險。有啲司機咪唔做囉⋯⋯

在客,個台最叻偏坦啲客。香港「投訴之都」係基本常識。個台當然就「客即上帝」啦!總之有理冇理,個客投訴嘅,永遠唔需要求證,輕則就警告你,中則停你幾日機唔俾人上線,最嚴重係直頭取消你帳號,唔受你玩。但係倒返轉,個客有咩不當行為,個台除左記錄返之外,咩都唔會做。筆者聽過最誇張,個客得2.5/5分都仲可以叫車。司機?低過4.2/5分個台已經唔俾你玩喇。由於啲司機唔可以好似的士佬咁,用自己方法解決客嘅問題(始終唔想收投訴),咁咪索性唔玩囉⋯⋯

在台,支援嚴重不足。你抽得四分一佣,當然希望你俾到多少支援。事實上唔係囉,首先啲客服係馬來西亞華人,對香港情況又唔熟識。再者,每次搵佢哋,任何問題佢哋都係話轉介相關部門跟進,咁要客服做咩?傳菜?再者,平時美其名就「司機夥伴」,有事你就「食自己」。筆者試過上線期間遇到輕微交通意外,個台除左記錄一下之外,就發咗個訊息黎話,呢啲嘢唔關個台事,個台唔會幫你搞㗎,拜~~~的士公司?有事會幫你出頭,整車唔洗怕,大不了按金扣返。你話,個台咁「優質」嘅支援,領教過嘅司機當然就金盤洗手啦⋯⋯

其實,個台對啲司機好啲,俾多啲甜頭,對投訴就俾多少少時間求證吓,對司機多啲支援,唔好一有咩事就推黎推去、割蓆,人哋先有心機同你做。唔洗搞到唔夠司機接單,然黎做埋啲無謂嘢引人注意,俾人搞。

 

【嗚巴軼事】

 

作者:車上人間

一個男人一架車,見盡香港人和事。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 190949
Date: 2019-03-06 07:21:14
Generated at: 2021-12-09 05:58:21
Permalink: https://www.vjmedia.com.hk/articles/2019/03/06/190949/【嗚巴軼事】就係唔想搭的士先叫你爸,點解大台