賣命?

(photo via cc Flickr user Simon Shek)

 

下午朋友傳來這宗新聞,以及訊息:「有事揾我傾,頂唔到就辭職」。

早前表示過工作上出現了一些狀況,想要辭職,大約8成的朋友表示:「時勢唔好呀,你咁樣辭職,未必揾得返呢行,其他工又唔請⋯⋯」只有2成朋友表示:「命仔要緊,工再揾過。」

今天教員室都在談論這件事,結論:「佢應該鬱住好耐,要响學校跳,佢個控訴都好大。」

在FB轉貼了這則新聞,有朋友留言一矢中的「辦學團體追業績,校長用人超過100%,中層做事吹毛求庛,低層硬食的結果」(Sorry,我唔知你想唔想特別提到你個名)

好多人對教師行業的印像,仍然停留在二三十年前,學生放學等於教師放學,學生放假等於教師放假,年年都係教果啲野,長約鐵飯碗⋯⋯請與時代並進,目前大部份教師都是合約制,每年續聘,學校不續約,原因五花百門,其中一個叫「合約結束」。於是乎,年青教師力爭上游,又進修(我有幾個三十歲左右的同事,已經讀了兩個master),又帶隊比賽,又搞年宵,又課後補課⋯⋯無所不用其技,為的,只是爭取續約。

今天先談日常工作量好了,不然我寫到聽朝都寫不完⋯⋯

像我住得離學校遠,一趟車程約70分鐘,學校要求8:00前要到校,所以我一般6點起身,6:30出門。

8:15班主任要到課室點名,10分鐘班主任時間,之後正式上堂。學生每日七節課,中間有15分鐘小息和1小時午飯,3:30放學,老師最早4:15可以離開學校。

一日七節課之中,老師大約有四至六節,上課是腦力、體力與EQ的戰鬥。中文堂學生能力差異大,每班有三、四個國內學生,一兩個「字都唔識多個,普通話非常唔普通」的學生;融合教育每班幾個不同需要的學生,隨便舉例說:兩個讀寫、一個過度活躍、兩個專注力失調、一兩個社交困難(這不算特殊需要,但當分組什麼的,就會出現問題)。學校提倡分層教學,一個老師怎麼能夠所有教學內容、教學過程都能「分層」呢?

噢!還有,不少學校是不准用咪的,本校是「不建議」,沒有說不准唷,但全校都沒有人用,過去五年兩個同事喉嚨生繭要做手術⋯⋯

高層說:教學過程要有趣,要令學生很想學習⋯⋯學生覺得悶,是老師的問題⋯⋯學生沒進步,是老師的問題⋯⋯要檢討課堂設計⋯⋯
sorry,離題,似乎我的控訴也不少~

15分鐘的小息及1小時的午飯時間,學校的做法是每個老師每星期有兩次「當值」,特別發生小學生在校離奇墮樓之後,高層對於「當值」非常重視,時常電郵「提醒」大家準時。大佬呀,落堂你都比我去下廁所先呀~上堂又話唔建議老師離開課室⋯⋯我其中一個duty是在早上8:00開會,8:15班主任課,及連續三堂之後的小息duty。係呀~公司合約寫明你返8:00, 高層無前線咁多堂,又唔洗做班主任,係會叫你8:00開會架~

午飯時間,一小時是指由打鐘落堂到打鐘上堂之間,如果小朋友好好學,落堂問你問題,係咪唔答佢?如果小朋友唔生性,做樣都要留佢幾分鐘訓話,買飯又好,叮飯又好,你都唔會即刻食到飯。什麼午間問功課,午間活動小組⋯⋯根本是沒有一小時午餐這回事。

終於捱到學生放學,就係老師開會時間。簡單的有級會,即教同一級同事討論進度、試題方向,小則15分鐘⋯⋯大則傾到5:00 。第二種是科組會議,大約隔星期一次,學校編訂嘅,傾咩?你老細總會諗到野傾,由於係學校編嘅,唔開會去睇醫生要正式請假(1.5小時,計3:30-5:00),又由於「官方時間」寫明到5:00, 不同老細(科主任)各自修行,有的科組傾完即散,敝科主任極守規距,必定要到5:00才放人⋯⋯邊有咁多野傾?一開學叫各同事預備15分鐘教學分享,議程唔多果日咪排一、兩個人落去分享囉,人人都分享完囉,咪第二輪分享囉⋯⋯點會無野傾呢?

我知道五點可以離開學校嘅老師叫做「早放工」,但合約寫4:15可以走嘅⋯⋯至於老師大約幾點走,要睇學校風氣。大約黎講,五點叫早,六點叫OK,七點叫還可以⋯⋯個人離開學校,唔代表唔洗拎野返屋企改、唔洗備課、唔洗做校本教材(下刪一萬字)

聽過有學校早過主任走嘅,仲要親自走去同主任講:「唔好意思,我今日有XX事(例如帶個女去睇醫生)要走先。」

假設我5點走,70分鐘車程返屋企(如果金鐘等多幾班車又再耐啲),食飯休息餵狗之後,又改功課、備課⋯⋯而我目標係11點左右瞓⋯⋯

宜家11:40,開始頭痛眼瞓,下回再續⋯⋯

(好眼瞓,如有錯字,請指正)

 

 

作者:游麗絲

文青、狗奴、前教師

閱讀後覺得好,請多多讚好及分享~:)

其他熱門文章

  • 港人學樂器小心被騙財——大提琴掠水記 by 莊公公
    二手琴市場好細,賣出去唔容易,價錢好低,香港地寸金尺土,仲要佔地方,即係擺明被勒索,如果唔係冇好日子過,以後上親堂有排煩。…
  • 【PR】開放世界獸人 x 功夫動作 RPG《BIOMUTANT》今月推出多平台對應 by VJGamer
      Epicsoft(Hong Kong)Limited 今日宣佈,由 Experiment 101 […]…
  • 鑽戒 by 藍兼併
    程子晴嫁給富商翁恭時只有24歲,而翁恭比她年長26年,二人的婚禮在五星級酒店舉行,城中名人富豪紛紛到賀,這段婚姻被外界視為父女戀,而程子晴承受着貪財嫁富翁的惡名。…
  • 朋友,並唔係要嚟搵笨㗎! by 小盛女
    「未諗㗎,都係落吓FB、Google廣告果啲,我畀啲相同價錢你,你幫我執吖。」Grace說。 「你係想我幫你整?你話我知總共要整幾多樣,幾時要完成,我再quote個價畀你啦。」我說。 「唔使咁大陣象!我哋咁熟,想你幫吓手咋,好簡單啫,你…
  • 如何成為護士?(包括登記護士與註冊護士) by Su子
    呢篇野係寫俾考完DSE,有志投身護理界既所有同學。…
  • 正常生活 by 健吾
    當我看到新聞評論,大家都在一面倒的討論感染者的「私德」不檢,導致大家連假都沒了。這樣子的狀況,似曾相識。就好像是,當愛滋病流行之時,「普通人」、「未感染者」把所有同性戀者的性慾當成是罪,只要你有「性行為」,你就是錯。…
歡迎讚好我們的facebook page,免費資訊源源送上。

文章資訊

ID: 190985
Date: 2019-03-06 23:59:48
Generated at: 2021-05-19 06:37:16
Permalink: https://www.vjmedia.com.hk/articles/2019/03/06/190985/賣命?