做隻貓做隻狗都唔好做好人

 

「你地講緊咩呀?」腦細Michael說。
「無呀Brenda最近好忙,我咪幫佢訂紙囉,好小事啫。」同事Bibi說。
「喂,唔做得咁呀,自己的事自己做,下次唔好喇Brenda,知唔知呀?」Michael說。
「哦。」我說,今次真係寶寶委屈,但寶寶不說,唔通我可以當住腦細面話:「不嬲都係Bibi負責訂,只係我好心幫佢訂過一次嗎?」

好人難做,特別係喺公事上,久唔久都會有同事叫我幫手,然後幫咗一次之後,嗰份工作就自自然然歸我,有鑊都係我揹,當我反抗,想叫同事「自己的事自己做」嘅時候,佢就會覺得我推卸責任,或者「少少事都托手踭」,甚至向腦細打小報告,我已經踩中過幾次地雷,所以喺公司真係做隻貓做隻狗都唔好做好人。

「Bibi唔識做㗎,你幫佢做啦。」Michael說,我心諗我又何嘗識?我話唔識佢就叫我學,邊學邊做,慢慢就會識,比機會我學多樣嘢。「Bibi忙緊其他嘢,你幫手做啦。」我都有十九幾萬樣嘢做緊啦,點解其他同事可以每次淨係專心做一件事,我又要multi-tasking?當我有少許微言嘅時候,佢就話:「你做得好,做得快,我先畀你做啫,能力越大,責任越大呀。」簡直係想令人講粗口。

你愈做得好,腦細就會比愈多嘢你做,因為將工作分比你之後,無論遇到咩問題,你都會自己諗辦法解決,而另一個同事就相反,會扮傻扮矇,反問腦細十萬個問題,點解1+1等如2嘅?點計㗎?我唔明喎,即係點解1+1等如2呀?我都係唔明喎,不如你再講一次,即係點呀?如果你係腦細,有嘢你會分比邊個做?

公司有啲同事好醒目,一係就扮無知,一係就扮惡專兇人,態度極差,令你唔敢叫佢做嘢,連腦細都話唔好比project佢跟,因為佢得罪人多稱呼人少,咁又可以做少啲嘢,準時收工。打工仔嘅生存之道真係學一世都學唔完,齋勤力,成隻牛咁係無用,多聽多睇多留意身邊嘅人同事先係最重要,Good luck to all!

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 191035
Date: 2019-03-08 22:36:04
Generated at: 2019-03-22 14:13:59
Permalink: https://www.vjmedia.com.hk/articles/2019/03/08/191035/做隻貓做隻狗都唔好做好人