【塔羅個案】人生無常:年輕女客人半年前笑住話「下次見」,然而今日已化一縷輕煙

文教 / 最新文章綜覽

 

有位可愛的客人,就稱佢為 Jenny 吧,未夠三十歲,大學畢業之後就穩定地工作,係個生活平淡嘅普通女仔;佢笑上黎幾甜,驟眼睇有幾分似當年剛出道嘅上戶彩。

Jenny 仲有一份兼職,就係教小朋友畫畫。佢自己本身其實亦都畫得一手好畫,「我想儲錢去歐洲,我有好多博物館同埋 Gallery 想睇,」Jenny 曾經咁同我講,「當然目前就未係時候,但係,如果有機會,我都想去歐洲讀一個短期美術課程,當係償個心願吖。」

係嘅,Jenny 本身亦都係一個非常秀氣嘅女孩子,每次見佢都係著住柔和顏色嘅棉質衣服,一把長髮素淨地結成馬尾綁在頸後;有次佢上黎搵我,係剛剛同小朋友上完堂,佢頭髮上面仲沾住藍色顏料,「哎呀!頭先嗰堂教佢地畫《怪獸公司》隻毛毛呀!」

Jenny 每半年搵我一次,每次都係問下工作發展、有無乜野需要自己改善,惟獨唔會問感情。

「感情嘅野,無得強求嘅,遇唔啱嘅,咪仲唔開心。」Jenny 父母離異後關係搞得不甚愉快,慶幸自細有個妹妹同自己情投意合,「我想得到幸福,但係我唔知有無咁嘅機會呢?」

Jenny 之後亦介紹埋佢妹妹 Zoe 比我識,Zoe 準備投身社工輔導方面嘅工作,有點迷惘擔憂。

然後有一次,Zoe 搵得我好急,「家姐暈左,驗完,佢有 Cancer,急性。」

我恍神。

我唔敢主動搵 Jenny,亦唔敢打搞 Zoe;我好想叫佢地上黎開牌睇下健康狀況點樣,但係同時我好怕面對,假如開左唔好嘅結果,我又可以點樣表達。

事隔一排,Zoe 上黎搵我,帶埋家姐 Jenny。Jenny 笑住同我講「好耐無見啦,神婆」,而我望住佢,瘦小,原本一頭長髮不復見,心裡是難受的,但我慶幸再次見到佢活生生喺我面前出現。

「化療做完了,醫生話之後係休養,要定期覆診食藥。」

我點點頭,我母親亦曾患癌症,所以病人化療後情況如何、如何處理,我大概有個概念。不過,其實休養期唔代表好返哂,因為病人體弱,更易受細菌感染,所以唔係話「小心飲食」就可以當無事。

Jenny 話自己樂觀,所以黎問自己幾時可以計劃去旅行,「真係好驚呀!今次捱過左,我係咁同自己講,旅行拿拿聲去左先啦,淨係去英國先都好吖!原來啲病真係可以話黎就黎!」

Jenny 開嘅牌,並不是那麼理想,去旅行對於佢黎講,係「遙不可及以及難以實行嘅事」;我心中閃過一點不安,但係,Jenny 需要較長時間去復元都係事實。

「嗯…我惟有上網睇住先啦,Plan 定都得架啫!」Jenny 笑住拍拍妹妹 Zoe 大腿,「你會幫我手架可?」

Zoe 笑笑不置可否,「到時再算啦。」;而我,忍唔住問 Jenny。

「你真係唔駛就健康問題開牌?」

Jenny 話「我聽哂醫生話,OK 嘅。」儘管佢眼神裡面其實有點閃爍不安,不過佢都係笑住同我講,「有啲咩再 Update 你吖!半年後見!」

-------------------

然後,我無再見過 Jenny。

然後,早前,我收到 Zoe 短訊。

「家姐今日火化了。」

我望住呢幾個字,腦袋,有點空白。

Jenny 離開,係因為佢肺功能衰退,有感染。

Zoe 話,佢努力過,佢撐左好耐,「佢同我講,仲未去過歐洲,仲未拍過拖,仲未食到某店嘅 Pancake,仲有好多野想做,好多野未試;佢應承左班學生,Jenny 老師好返之後,會返去教佢地畫《龍貓》。」

Jenny 由家人目送拔喉的一刻,她哭了。

-------------------

我之所以寫呢篇文,其實亦都係受 Zoe 所托。Zoe 當然亦是化名,只不過,佢份工,亦與人嘅生死有住好多關係。以下,係 Zoe 想向大家轉達,或者分享嘅一啲說話:

我唔想懶係正能量咁叫人「咩事都要樂觀面對」同埋「要珍惜生命」,社會生活無盡壓力,情緒難防;當萬事試盡,事情亦難覓轉機,或者,最簡單一句,當人諗埋一邊,找棟高樓,跳下去,一了百了……呢種想法,我唔認同,但只能說我理解。

但係,如果你有力氣生活下去的話,珍惜你所擁有的。

珍惜那些值得你珍惜的。

-------------------

願已化輕煙的你,一路安祥。

 

【塔羅牌個案分享】

 

 

作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 191195
Date: 2019-03-13 23:48:23
Generated at: 2019-05-22 18:16:06
Permalink: https://www.vjmedia.com.hk/articles/2019/03/13/191195/【塔羅個案】人生無常:年輕女客人半年前笑住話