【嗚巴軼事】鍾意養貓狗你嘅事,點解要逼司機一定載你隻寶貝?

 

香港人養寵物都養得特別自私,覺得自己鐘意貓貓狗狗,人哋都要鐘意埋一份。

筆者本身對於寵物上車並不反感,前提係麻煩事先通知,同埋加返個寵物袋,就算佢痾屎痾尿都係係返個袋入面。不過,筆者遇過以下呢件事之後,就以後都「謝絕寵物」喇。

話就當時係筆者入行冇耐,筆者係香港仔接到張單去華貴接客,去到華貴總站之後,由於未見到個客,於是筆者打電話俾個客,個客就話佢要遲幾分鐘到,咁筆者照等啦。等到個客(一男兩女)黎,筆者嚇左一跳,「仆你個街!地拖毛黎嘅喂!」(筆按:「地拖毛」係一種大狗,由於啲毛好似以前個啲綿條地拖咁,所以筆者姑且咁樣稱呼呢種狗。如果讀者睇過多X氏油漆廣告,你應該知係咩樣)筆者忍唔住問一句:「點解唔早啲同我講?」個客竟然答:「乜要講㗎?」筆者個吓真係即時無名火起三千丈,不過筆者抑壓住心中嘅怒火,好冷靜咁講:「呢啲係基本尊重黎。唔係人人都鐘意寵物㗎,上車先啦。」唔係擔心cut單之後唔知幾時有單,筆者唯焗做。

隻「地拖毛」上車後,筆者隱隱約約聞到陣狗味(唔養狗嘅人對呢啲味好敏感),心情都已經好差。行程途中,坐係後面個一男一女開始討論起來,到底隻狗今晚定聽晚沖涼,「隻狗今晚定聽晚沖涼?」個刻我心裡面充斥住四個英文字母:DLLM。你唔出聲通知我都算,明眼人都知如果老實講出黎就肯定唔會有人肯載(我唔會叫呢啲做「拒載」,我相信巴士定港鐵都唔會俾「地拖毛」上車)。但隻狗咁污糟,又成陣味,更唔知有冇狗蝨。最後我俾左一粒星,仲報埋上台投訴個客。

唔係人人都養寵物,亦唔係人人都鐘意寵物。筆者真係唔明,點解你養狗就要我包容你隻狗?因為你俾個幾十蚊車錢?咁其他客人呢?如果其他客人有鼻敏感呢?點解可以咁自私?

 

【嗚巴軼事】

 

作者:車上人間

一個男人一架車,見盡香港人和事。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 191191
Date: 2019-03-14 05:59:35
Generated at: 2019-05-22 18:13:40
Permalink: https://www.vjmedia.com.hk/articles/2019/03/14/191191/【嗚巴軼事】鍾意養貓狗你嘅事,點解要逼司機一