【嗚巴軼事】「趕時間」呀?唔好叫車啦,搭的士啦~

 

大台標榜撳吓個掣,即刻就有車去到你面前接你。於是個個都以為架車識得瞬間移動。

話說呢晚我載緊個客去觀塘,當個客差唔多落車嘅時候,另一張單就響喇,張單個客嘅名叫做「小姐」,上車地點係巧明街。不過由於車入面個客想我駛前多幾百米俾佢落,於是我就要駛過海濱道同偉業街交界嘅路口黎放低個客。於是,我要由偉業街兜返個圈去巧明街接「小姐」。途中,「小姐」就俾短訊我,話佢係駿業街街市等我,問我係咪出發緊,由於我揸緊車,用唔到文字覆佢嘅關係,我索性打電話俾佢。

(我:我,小:「小姐」)

我:你好,我而家黎緊接你,不過要啲時間。

小:吓?我好趕時間喎!

我:(小小著著地)我而家趕緊黎,如果你肯等,我會繼續黎接你,否則就唔好意思,你搭的士啦。不過要取消就快啦。

小:(發脾四)咩唔好意思呀!你收左我錢喎!咁算點呀?!

我:(無佢咁好氣)小姐!嗰個係信用卡hold你數,我未正式收你錢㗎。你唔搭我就取消佢啦。

最終我就取消咗張單,無謂到時佢上到車大家面阻阻。

嗱!老老實實!我哋都好想快啲去接客。奈何有時車上面另一個客又話要駛前啲落,有啲又話要入埋閘,呢啲都係時間。唔通我趕個客落車然後接你?我可以為你趕另一個客落車,我亦可以為咗另一個客趕你落車。再者,你趕時間係你嘅事,你自己都有責任安排自己出門嘅時間,若然你真係急嘅,你係街遞手啦。我哋大台啲司機好寬宏大量,唔介意你搭的士㗎。

仲有仲有,一日未開始行程呢,一日我哋都未叫正式同你計錢㗎。你落單之後收到嘅銀行電郵呢,係通知你個車費條數俾大台hold 住咗,唔係正式過數。完咗程車先正式過數㗎!所以唔好未上車就擺定個大爺款呀!

 

【嗚巴軼事】

 

作者:車上人間

一個男人一架車,見盡香港人和事。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 191236
Date: 2019-03-15 06:43:36
Generated at: 2019-05-22 18:14:48
Permalink: https://www.vjmedia.com.hk/articles/2019/03/15/191236/【嗚巴軼事】「趕時間」呀?唔好叫車啦,搭的士