好開心呀,梁天琦罪名唔成立呀

 

梁天琦一案,陪審團四日四夜後終於下達決定,暴動罪不成立。係唔少人鬆一口氣既同時,相信又會有啲人趁機指出:

香港既法治真係我地既基石喇。我地所以無論如何(OMD-OVER MY DEADBODY)咁樣守護。因為根據呢個邏輯,只要有公正既審訊,法官既裁決仍然係不偏不倚既。就算宣誓效忠基本法,一樣唔代表佢地就係狗官,亦都可以繼續以法治港,依法辦事咁話。只要咁樣一路推而廣之,又可以得出關鍵既『一X』(任意插入任何VAR),最終都可以令到香港見到曙光咁話。

坦白講,我唔知果啲人見到既曙光係乜。可能係佢青光眼有曙光,又或者係我自己根本視力有問題,所以自己往往望出去,都係一片黑暗。

我地亦都到呢一刻,其實又真係唔知道下一步律政司會唔會繼續上訴,或者對佢地窮追猛打,或者佢地又有其他手段。法律既野我當然唔係專家。但係政府機器一運作起上黎,佢地簡單黎講真係無限資源,慢慢同你磨。佢地當返工,做完你,照樣返屋企享受天倫之樂。但對於抵抗者黎講,唔單止叫負隅頑抗,就要每一日惶惶不可終日,根本就唔知終結既一刻究竟係邊。

而有一啲既定既事實亦都無法改變。極有可能佢地已經無辦法係主流(不論政壇層面、職場層面、甚至只係學術層面)到融入番去香港社會。佢地或者無放棄到香港,但係香港(或者唔少香港人)已經放棄左佢。呢個同無數既DQ個案,各種各樣政府既行政立法手段去鎮壓港獨,消除晒所有可以影響所謂一國兩制或者係主權既人物、政團手段都係差唔多。中間仲有好多從上而下既潛移默化,意識形態既掌控。一單判決,我地固然可以話正義咩終於都勝利,或者幸運女神對我地呢方微笑(左一下),但係我地其實心底都明白,真係久旱先逢甘霖一滴。但最後下場,一場可以渴死。

所以世界有無好到,其實無左。但太耐無好消息喇真係,係咪連高興都唔俾呢。唔係,可以有值得開心既消息,咪開心下囉。我地都希望可以自欺欺人咁樣活到落去。呢個香港,唔識咁樣做,點樣頂每一日呢試問。

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 191498
Date: 2019-03-22 14:51:58
Generated at: 2021-06-24 20:07:49
Permalink: https://www.vjmedia.com.hk/articles/2019/03/22/191498/好開心呀,梁天琦罪名唔成立呀