【外賣仔日記】不可聯絡的客人. . .

住過酒店都會知道有一樣嘢可以提出，叫「 Do not disturb」（酒店職員俗稱DND），意思就係叫酒店職員唔好打攪你間房啦。但係你提出呢樣嘢，就唔代表一定唔會打攪你嘅，畢竟如果間房入面有人嗌晒救命而門口掛住「 Do not disturb」都唔理咩。
如果當酒店響某啲原因下要無視客人提出嘅「 Do not disturb」，呢樣嘢酒店叫做「踢DND」。而酒店要「踢DND」係好麻煩嘅，畢竟客人要求唔好打擾，你就要去打擾，無強烈理由去執行係會好麻煩。

之前我送過一單外賣就遇上「 Do not disturb」。

呢一單係送去一間超高級嘅酒店，響香港已經開業接近超過半個世紀嘅五星級酒店。本身送酒店10間有9間都係酒店接待處代收然後由佢哋送上樓俾客，但係呢一間酒店係同我哋確認咗個客人名字後就由一個笑容燦爛嘅酒店職員陪同我哋攞上房

笑容燦爛嘅酒店職員好似係咁樣嘅：

酒店接待處職員示意圖

咁本身去到搭緊𨋢上酒店房嗰陣都冇咩問題，但係去到門口我哋就見到門口掛住「 Do not disturb」。提提大家，呢一間係超高級嘅酒店，門口掛著「 Do not disturb」我哋可以敲門去通知客人外賣到咗嘅機會係零呀～！！！！
因為酒店「踢DND」本身已經好困難，而且呢間酒店係超高級，無視客人提出嘅要求係近乎冇可能。

但係你嗌咗外賣，如何可以唔打攪你呢？畢竟係你主動提出要人哋俾嘢你，如何做到唔打攪你又要人俾到嘢你呢？

陪同我上酒店房嘅嗰個職員開始好細聲咁用對講機問緊接待處可以點做。我見佢對講機嗰咪係貼近嗰咀嚟講嘢。因為間酒店真係超高級，我唔敢想像滋擾到客人嘅後果係會點。

因為佢帶住耳機，我唔會知接待處同佢嘅對話內容，然後個職員同我講返話原來個客嘅小朋友訓咗覺，所以門口有「 Do not disturb」。

咁就有趣喇，酒店就要去提醒客人外賣到咗要開門攞外賣，但係又唔可以發出任何聲響去阻礙佢小朋友訓覺。

最後個職員選擇去敲門。你可能會心諗，超高級嘅酒店入面嘅尊貴顧客講明唔可以滋擾佢，酒店職員去敲門？冇錯，佢真係去敲門，但係使用嘅力度同埋敲門所產生嘅聲音我相信用儀器都未必可以量度得到，因為真係好輕力架。

但係神奇嘅事發生啦，個客竟然開門呀～！！！！！！！

個客開門個一刻我真係呆咗呀～！！！！！！！！

我想問個客，咁你都聽到？？？？？？？？？勁呀～！！！！！！！！

專題：【外賣仔日記】

作者：外賣仔

閱讀後覺得好，請多多讚好及分享～：）