【嗚巴軼事】新制度「積分賞」,司機有無著數?

 

 

大台係今個月開始,推出左一個叫做「積分賞」嘅計劃,大台聲稱呢個計劃係「為司機夥伴打造更彈性、更全面的補貼計劃」。

個計劃嘅玩法係咁嘅:司機會按本身嘅評分劃分為「白金」、「金」、「銀」、「銅」四級,每個級別都有一個目標分數同埋「積分賞」金額(即保證收入)。以白金級為例,目標分數係900分,達成目標分數後嘅保證收入係五萬蚊,即係如果你做滿900分嘅車資係三萬(扣埋隧道費、抽佣),而且接單率達80%同完成率達60%,咁月尾就會得到二萬蚊補貼。

得分方法係咁嘅:繁忙時間(星期一至四:06:00-10:00,17:00-20:00;星期五:06:00-10:00,12:00-20:00,22:00-02:00;星期六、日:12:00-20:00,22:00-02:00)完成一程可得3分,其他時段完成一程可得1分。分數每月1日重新計算。

呢個「積分賞」美其名「更彈性,更全面」,睇真啲又係搵司機笨,兼且乘客又唔係完全得益。

上年八月嘅時候,大台推出一個叫「優月保」嘅計劃,大概玩法係:個台有幾個目標行程數你揀,只要每月做足目標行程數(接單率達80%同完成率達60%)就會獲得補貼。例如:目標行程為50程,完成後保證收入就係五千,即係做足50程都未夠五千(扣埋隧道費、抽佣),就會貼返差額俾你。而且冇時段限制。

舊嘅計劃底下,司機嘅目標係自訂嘅,而且唔受評分限制。總之你做夠數就會有補貼,甚至如果你做爆數,佢會自動幫你升下一個目標,就算新目標達唔到,都會用舊目標計補貼俾你,仲要係車資最低嘅行程黎排(假設目標50程,你完成左60程,咁個50程就會計車資最低嘅50程作基準計算補貼)。但係係新嘅計劃下,所有司機嘅目標程數就取決於本身嘅評分。如果本身評分高嘅,目標程數同獎金都相對較高,反之亦然。即係話,如果你本身分唔高,但係又做爆數的話,你冇得向上「挑戰」,除非啲評分都升。但係由於評分係計最近500程嘅平均數,加上唔係每個客俾五星,如果你收到一次一星,你會被扣0.01分;如果你想攞返呢0.01分,你可能要10個5星先夠。即係話,你已經俾個分困死咗,就算做爆數,到最後都係一毫子補貼都冇。

其次,由於「繁忙時間」的行程得分係其他時間時間嘅3倍,於是「跑分」嘅司機就一窩蜂係「繁忙時間」開機,其他時間就水靜鵝飛。咁樣衍生出兩個問題,就司機方面,以前本身繁忙時間有加乘嘅位置(中環、尖沙咀、北角)全部冇哂加乘,因為供應多咗嘛,簡單經濟學原理就唔多講喇。總之同一程車同一時間,其實搵少咗。在客黎講,叫車唔一定繁忙時間,好似星期一至四下午放學時間,其實都好多人接放學叫車,咁突然又一班司機唔開,客叫唔到車又變相又流失一堆客人。

第三,個計劃係吸引咗好多司機出黎「跑分」,但其實乘客數量又唔係增長得多,於是街上面一堆車等客,以前繁忙時間「單駁單」嘅盛況,今時今日都成咗絕唱。而且,呢個「積分賞」仲衍生咗一個怪現象—叫客拆單,即係個客本身連續去3個地方。司機為咗賺分,就叫個客拆開3個地方,分開3次叫車。

好多司機呢兩日都係面書專頁度話「我跑夠分啦」,「我仲差幾多幾多分先夠呀」。我笑而不語。

 

【嗚巴軼事】

 

作者:車上人間

一個男人一架車,見盡香港人和事。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 191644
Date: 2019-03-26 06:36:42
Generated at: 2021-12-09 06:10:23
Permalink: https://www.vjmedia.com.hk/articles/2019/03/26/191644/【嗚巴軼事】新制度「積分賞」,司機有無著數?