做求職者都唔一定要卑弓屈膝嘅

 

以前阿姐教落,practice make perfect,見工都係一樣,之前裸辭後我休息咗幾個月,突然要tune返個channel去見工係有啲難,好易撻cue,所以佢叫我send cv去啲普通想做嘅公司試下先。好好彩都有幾個面試嘅機會,每次見工之前我都會花好多時間準備,刨熟公司嘅網頁、Facebook同IG啦,睇下啲報導,了解公司嘅背景同嚟緊嘅發展,有咩競爭對手,甚至睇埋interviewer 喺LinkedIn嘅背景,因為我覺得機會係留比有準備嘅人,至少就算衰咗自己都唔會後悔。

其中有一間公司係要做written test,咁都好正常嘅,見marketing嘅話 10間通常有7間都要做,通常係做翻譯、寫proposal或情境題等等,今次呢份就例外,問嘅都係正常面試會問嘅問題,但有成5板紙,15分鐘根本無可能寫得晒,於是interviewer話比多15分鐘我寫。寫完晒之後就開始正式面試,不外乎都係自我介紹,離職原因,對公司有咩了解等等,答完晒之後佢就跟住份written test問一次一模一樣嘅問題,我答完佢就冷笑一聲,話我寫嘅同我講嘅真係差唔多。

我當時真係黑人問號,同一條問題,答案梗係差唔多,我已經加咗啲例子去詳述下,然後佢就開始好不滿我嘅答案,鄙視我以前所有做過嘅嘢,覺得根本不值一提,跟住佢就開始介紹自己公司有幾咁high-end,啲客有幾咁尊貴,對呢個職位嘅人要求有幾咁高,佢嘅嘴臉真係好bitch,完全係狗眼看人低,佢仲同我講呢個post就係直接under佢。

「我哋而家都見緊好多candidate,所以有個基本要求,就係你2日內要send個email比我哋,講下你可以為公司貢獻啲咩,有咩可以impressed到我哋,有咩優點同工作經驗,說服我哋點解要揀你,咁我哋先會再考慮叫唔叫你second in。」Bitch說。
「明白,唔該你。」我微笑地說。

果日In完之後我就去咗旅行,send email?真係啋佢都傻!無錯,平時我係會主動send thank you email比公司,但係呢間我係肯肯定唔會做囉,有啲人話interviewer係會特登成程都黑口黑面,就係想睇你識唔識應對,心理質素高唔高,但我相信呢個女人係打從心底裡bitch,日日對住佢真係會想死,自虐狂先頂得順。

有人會覺得求職者永遠就係處於下風,要卑弓屈膝咁求份工返嚟,而interviewer就係高高在上,好似揀貨咁揀,但其實我想講interviewer揀求職者嘅同時,我身為求職者都一樣係揀緊公司,基本嘅互相尊重都好重要。至於點解要為面試準備咁多,就係因為當你有幾個offer喺手,就可以慢慢揀,根本唔需要擔心。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 191732
Date: 2019-03-27 06:56:12
Generated at: 2020-09-21 11:16:34
Permalink: https://www.vjmedia.com.hk/articles/2019/03/27/191732/做求職者都唔一定要卑弓屈膝嘅