其實大家都只係想權利機關良心發現？

隨緣有好多朋友都做記者。佢地都盡心盡力。好多屋企都有個錢，如果唔係，點做落去？最近有個記者朋友話，佢做左二十年，原來月薪都係一萬五千幾。係香港，而家雲吞麵都40蚊碗啦。點生活呢？

我真心唔知，所以我都好真心佩服做左十年記者既人。唔知點解，佢地真係可以收咁低人工去做咁辛苦既工。佢地既工作，越黎越無尊嚴。官員越黎越唔怕傳媒，亦都唔會對傳媒既人畀足夠既尊重。好似最近林鄭個記者會咁，如果佢怕記者，驚記者，佢點會將三個咁重要既議題合埋一個記者會去搞？佢就係唔怕你，先會咁做啦？而同時，佢真係唔需要公關。因為，即使你寫到佢幾衰都好，佢既民望，都預左會一直跌。而同時，佢又好似覺得只要直通天庭，就唔使有驚你記者點睇佢。佢甚至可以講，話「你地覺得我傲慢」，好似好委屈咁。如果佢唔係傲慢，唔係睇死你地新聞行政人員協會（即係果啲總編，採主），一定會叫記者做。而記者，係唔會唔聽上司話既。所以，就算佢點樣都好，佢想做既野，都叫做左：我開左記招，交代左，你有畫面，我做左我果份架啦。你冇得挑剔我。

而記協，你都預左佢唔會有好多招數，咪又係出個聲明囉，話我唔滿意囉。之後會點？下次會有改變？應該都唔會。因為，佢根本唔怕你。特首而家覺得自己強勢管治。所以，冇出事，就冇事。

地鐵出事，大家咪又係照坐，之後覺得地鐵自己會改善？
林鄭唔尊重記者，記協咪又係出個聲明，希望佢良心發現？
我其實幾唔明，好多人都識講，誰大誰惡誰正確。咁你唔大，唔惡，佢先唔尊重你啫。如果你唔可以得罪，好似李嘉誠，王志民咁，你估佢敢唔敢唔畀時間你，唔尊重你？

你不被尊重，係因為當權者覺得不需要尊重你。只係期望人良心發現，其實香港人，係咪真係咁天真？

作者：隨緣

八十後公關公司小卒一名，渴望有一天，只是有人按讚，我就會飽。

閱讀後覺得好，請多多讚好及分享～：）