我是一個抑鬱症患者

文教 / 最新文章綜覽

 

Hi,我係一個抑鬱症患者,唔係自以為係,而真係睇過精神科醫生確定過嘅。我好鍾意笑㗎,笑點算低呱……anyway 有朋友話過我笑點低囉~只要嗰種抑鬱感覺唔嚟搵我,我就好似痴咗線咁係咁笑,因為我阿媽賜咗一個好好嘅笑容俾我,所以對自己嘅笑容係非常滿意,都有人走過嚟同我講我笑得好睇叫我笑多啲,我絕對唔會覺得驚訝(撥頭髮)。可是,我唔係嗰啲冰冷女神(根本同女神兩字扯唔上關係啦),厭世樣、憂愁樣擺係我面上,見到嗰塊西面連我自己都討厭,而慘在係生活中我好多時候都擺塊西面出嚟。請相信我,我係唔想咁㗎(哭)。

話你地知,大約十年前係我病患最嚴重嘅時候,每日只瞓到兩至四小時,甚至放假無嘢做,我都係瞓四至六小時,瞓醒嘅時候牙關咬緊,完全瞓得唔好。因為咁皮膚爆晒暗瘡,可以用爛面嚟形容,眼圈黑到混入熊貓堆佢地會以為我係同類,仲好易流眼水,打個呵欠都好似喊咁流兩行淚出嚟(好鬼尷尬㗎),身體好弱,經常病,傷風感冒常伴左右,胃痛簡直係我兄弟。就係咁身體差就皮膚差,皮膚差就心情差,心情差就睡眠差,睡眠差就身體差…………無限輪迴,沒完沒了,等死咁過日子,好唔甘心,但好無助,亦都無奈。知道出事,但人工低,唔敢睇醫生,驚貴又唔敢面對。

係黑洞迷失嘅驚恐應該係咁,就係個病所以死亡使者成日嚟搵我玩遊戲。死亡使者係唔會直接推你去送死,係做好多嘢迫你自己去送自己一程。你會胡思亂想,完全失控,知道有好方向、知道有正能量,但負面嘅方向根本係磁力王,日子總係攬住負面磁鐵做人。電視嘅爛鬼廣告叫你唔好理負面情緒簡直想DKLM,係啦喎,你出一個廣告啲人就輕易無視負面情緒啦喎~係咁嘅話世界使鬼精神科醫生呀,全世界都拍哩啲低能廣告就得啦!真係ON9無極限!基本上受情緒病困擾嘅人,抗壓能力好低,小小嘢都驚,容易憂愁、容易煩躁,當嗰啲感覺嚟搵我,我就好驚會俾人見到我哩啲弱點,好怕會受傷,所以我會暴躁,覺得咁樣至少會保護到自己,都習慣咁樣保護自己,所以我暴躁唔代表我躁底。另外,嗰啲情緒會影響生理,試過係街個心好痛,呼吸困難,唔知點算好。亦試過呼吸混亂,頭暈,心跳加速,四周嘅聲音都係噪音,覺得好嘈,就係咁皮氣都會跟住嚟。正常社會生活無可能無壓力㗎嘛,尤其香港係一個壓力爆煲嘅城市壓力又點少得喎,所以長期俾哩啲感覺折磨,有乜可能唔會幻想點死,直頭會去計畫啦~

當然,真係由得嗰啲感覺控制自己,我唔入精神病院接受治療,我都早就了結咗自己。咁我點解仲活到依家呢………………待續。

 

作者:紫玥

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 192132
Date: 2019-04-03 22:05:08
Generated at: 2019-06-24 20:49:36
Permalink: https://www.vjmedia.com.hk/articles/2019/04/03/192132/我是一個抑鬱症患者