我是一個抑鬱症患者——有咩方法令抑鬱會轉好?

文教 / 最新文章綜覽

 

我很感激我的男閨蜜,因為沒有他,那段在黑洞中浮游等死的日子,我是很難捱過的。

情緒病患者或受情緒困擾的人,通常心靈受盡極大痛楚,他們未必會尋死,但很多都會以傷害肉體,以皮肉之痛掩蓋心靈之痛,未嘗過的是很難理解的。而我呢,等死中的心情時時刻刻都想有意外發生,因為意外死亡咁樣會俾人感覺無咁自私,咁樣會好過啲。

有試過多次在公路旁傷心啜泣,望住一架架高速嘅車經過,只要閉上眼衝出去,就這樣一了百了,無需要再接受世界給自己的傷痛,但一想到這樣會令司機有陰影,可能造成幾車連環相撞,真的是很自私的死法,所以沒有去做。幻想跳樓,咁會嚇到街坊,屋企變兇宅,唔可以咁自私,又唔可行。有一次,一件很傷痛嘅衝擊來襲,受不了,詳盡地計畫點樣死,點樣安排自己嘅儲蓄俾老爸。就係沖涼嗰陣,我個腦由頭到尾清晰咁安排好整個行程表,好耐未試過咁清晰想嘢啦,依計行動就係㗎啦~突然我唔知係我幻覺定係天使係我耳邊好清楚咁講:「不如你試下過埋聽日先啦~」好神奇,我就真係試下一日一日咁過,不過,每日潛意識好似係道製造意外一樣,每分每秒都心不在焉,明明唔趕時間,但就成日亂衝燈過馬路,相信我,這不是刻意去做的,只是我自己都唔知道自己在做什麼,並且大命的我常常跟意外擦身而過。記得那陣子有個同事對我講:「真係要捉你去學過馬路」,因為他見過不少驚險場面在我身上發生,厲害是我掩飾自己的情緒病功力深厚,所以他以為我的失常是我自己魯莽吧了。另外我的受壓程度好低,小小事都覺得事情衝著自己而來,我同負皮困獸鬥,我走唔到出去呀~好想死,又唔能夠自私死,咁我可以點呀?

哩個時候,我個男閨蜜登場啦~嗰時嘅網絡時代係潮流用MSN同寫BLOG㗎!通常我都會係BLOG寫好多嘢發洩,但唔敢寫得太深入,怕俾人睇穿我內心,但我哩個閨蜜係個洞察力高又細心嘅人,佢點會睇唔穿我係道發洩緊。而且佢係我閨蜜,我又點會無同佢講我之前發生過啲咩事令我大受衝擊,只係佢當時仲未知我有抑鬱啫。最初同佢嘅MSN對話比較吹水FEEL,因為好驚煩到佢。然後慢慢試下搵佢講生活上嘅煩事,越講越多,差唔多日日都搵佢講,小小嘢都講,佢竟然唔嫌棄我煩,仲續一幫我用唔同角度分析,就係想我內心好過。例如我唔明點解公司嘅姣雞咁污穢,但就好多狗公扶助佢。佢就會話:「哩個世界好公平㗎,你想下,女性最珍貴嘅嘢、人性最寶貴嘅嘢,佢都可以付出,如果咁都唔俾佢換到想要嘅嘢,咁就真係好唔公平啦~」喂!聽完,個心真係順返晒㗎喎!另外,佢又對我講過:「好友係自選親人」,的確係!當我認定對方係我好友,我真係會願意付出好多,好珍惜、好驚失去,可能因為我無乜親人關係。而且佢對我咁講,個心真係窩咗~哩條友,我諗我哩世都會同佢做自選親人,如果佢死咗,我應該會同失去阿媽一樣傷痛。雖然佢細我一年,又矮過我,但我就覺得佢似我哥哥多啲,就好似前世佢係我阿哥,今世再續前緣繼續兄妹情咁。幾年前,王菀之有首《哥歌》,每逢聽哩首歌我都會想起哩個哈比人哥哥。

 

P.S:有人問過有咩方法令抑鬱會轉好,我會答「聊天」……………………待續。

 

 

作者:紫玥

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 192173
Date: 2019-04-05 06:05:24
Generated at: 2019-04-19 13:28:36
Permalink: https://www.vjmedia.com.hk/articles/2019/04/05/192173/我是一個抑鬱症患者-有咩方法令抑鬱會轉好?